何依婷與圈外男友感情穩定 雙方已見家長：相處好舒服好有安全感
撰文：吳子生
出版：更新：
何依婷（Regina）今日（4/11）現身電視城出席無綫綜藝節目《思家大戰》錄影。提到早前與神秘男於內地睇展覽時意外被網民捕獲，戀情被迫曝光，Regina接受《香港01》訪問時表示：「其實自己都想將感情事低調處理，但就冇刻意去隱瞞，因為本身我唔係一個鍾意去高調去曬恩愛同埋分享我生活好多嘢嘅人嚟，咁所以我係冇刻意去避唔想畀人知，平時我哋都有一齊出街，但就冇俾人發現。」
Regina透露男友比她年長一歲，從事物流行業，為人踏實孝順：「我好欣賞佢嘅性格，佢係一個EQ好高嘅人嚟，佢好少會發脾氣同容易嬲，同埋佢好支持我去認識多啲嘅朋友。（雙方見晒家長？）都見晒，因為我同佢都識咗好耐，又細細個出到嚟做嘢一段時間，見證大家成長，變咗同佢相處好舒服，好有安全感，佢個人係好真。之前我成日同人講，我鍾意男仔性格好，我講咗好多年冇人信，但最後而家係真。」