《一屋老友記》有望拍續集？　呂慧儀：等緊修哥、Bobby號召

去年翡翠台6月播映的《一屋老友記》，口碑收視也相當不俗，平均收視達28.2點，大結局的最高收視更達35點，是近年翡翠台少有的佳作。當時已傳出《一屋老友記》有意開拍續集，但轉眼一年過去，觀眾現在看的卻是10年前倉底劇《蘭花劫》，令不少網民相當失望，認為翡翠台在對手欠奉下即不思進取，用舊劇敷衍觀眾！近日呂慧儀在Ig上載她跟歐陽震華及陳偲穎（菲菲）的合照，即時勾起網民回憶，紛紛留言話掛住寶家，又問到何時開拍《一屋老友記》續集？

呂慧儀在Ig回覆網民留言，表示她也很想拍攝《一屋老友記》續集，她接受《香港01》訪問，對於去年風風火火，傳出有意開拍續集，但事隔一年卻仍未有眉目，她表示：「呢啲真係要公司啲老細傾啦！我哋啲小人物唔知上面啲老細傾成點？當然如果開續集梗係好啦！嗰時我哋拍嘅時候都好開心嘅！」其實呂慧儀自己也相當忙，在回應時也正為翡翠台處境劇《愛．回家之開心速遞》拍外景，更遑論其他演員。

呂慧儀笑言：「《一屋老友記》呢套劇實在太好，令到我哋都好忙，所以個期就難度啲，各自都開緊劇，等人齊先有續集嗰回事。當然都希望有啦！因為大家鍾意，我哋又拍得開心。（是否監製號召就會即時埋班拍劇？）我哋係等阿修哥號召，仲有Bobby同埋羅蘭姐。呀！仲有劉江老師。」由於《一屋老友記》甚受歡迎，其後更衍生出旅遊節目，由寶氏一家在翡翠台主持的《一屋老友去旅行》，去年Bobby就透露可以搞埋舞台劇，但呂慧儀就坦言：「做舞台劇就要兼顧更加多嘢啦！當然我哋「成家人」都有默契喺度，但如果舞台劇就要更多時間排練，更加難度期。」

在《一屋老友記》中呂慧儀飾演的阿花，是百分百的港女老婆，經常要她的老公，三寶張穎康照顧。若然《一屋老友記》開拍續集，劇情可以如何發展呢？呂慧儀表示：「都係圍繞屋企嘅話題啦！人物角色都係做返三寶老婆，大結局咪啱啱有Newborn baby嘅，可能講我做咗阿媽，生咗baby十年後嘅生活，都可以有得發展落去。」《一屋老友記》讓人記憶猶新，劇中角色又甚受歡迎，無綫高層還是快點拍板落實開拍續集，總好過播出土倉底劇啦！