【叮噹歌神】技安生日出新歌慶生　神曲《我是胖虎》你頂到幾耐？

經典動畫《多啦A夢》（前譯：叮噹），相信冇人唔識。而當中的走音歌王技安（現譯：肥虎），以其充滿破壞性和壓迫感的歌聲，經常震撼大雄同靜香等老友和觀眾耳朵，聽一下就會頭暈、作嘔，嚴重者更會成個訓低。之前就有日本網友指，截至目前因聽技安唱歌而氣絕的共有35人，包括佢老師……但技安抱住無論幾難聽都總有知音人的信心，繼續向歌手夢進發！適逢6月15號係佢生日，所以決定搞大佢，出新歌！（大雄按：救命呀～）

《多啦A夢》漫畫自1964年創立以來從未停止過，而一眾主角也停留在小學生的年齡，話雖如此，生日總是要過。日本朝日電視台目前每逢星期五仍keep住播《多啦A夢》，而下一集（6月9日）將起題為「Slump！巨人愛之新歌」，聽個名都知勁！事源技安因為6月15號生日，所以創作意念大發，作了新歌《多謝我自己》（ありがとう、オーレ！）宣揚愛自己、感恩人生的訊息，聽落同欣宜首《女神》有得揮。官方指技安對上一次有新歌已是5年之前，但就未有講明歌名和出處，唔知有冇讀者記得呢？

技安多年來從不收埋自己美妙歌聲，其首本名曲《我是胖虎》經常聽到班朋友仔嘔白泡，香港版本配音時都會填上「我叫做胖虎 我係小霸王 大力又強壯 係個男子漢」的歌詞，真係男人的浪漫。說回新歌，電視台網頁於下周播放後，會開放此曲給各位下載，喜歡另類耳朵刺激的朋友千萬別錯過。此外神奈川的川崎市，「藤子．F．不二雄Museum」更於現在至7月2日期間，會舉行「胖虎Fair 2017 Gian Cafe」活動，將會推出多款以技安為設計概念的食物同紀念品，「技安迷」（如果有）一定要去朝聖啦！