傳林家棟回巢無綫接替曾志偉　陳百祥拒回應：無謂問啦

陳百祥（叻哥）今日（12/10）現身紅磡出席「香港明星隊x榕江村超聯隊」足球邀請賽2023新聞發布會。提到上次到貴州作客，挑戰村超險勝一球贏4:3，而村超將在11月11日來港作客，被問到香港明星足球隊會否為對方「放水」贏波，叻哥在接受訪問時表示：「放水？我哋隊波係唔輸得喎，其實比賽係第一，但我就覺得友誼都要嘅，嗰問題係上次我哋贏咗，人哋就會復仇，佢哋仲話今次會強陣落場，我哋就當然強陣對抗啦。（諗住入幾多粒？）我就冇諗話入幾多粒嘅，呢啲留返畀譚詠麟啦。」

被問到曾志偉是否可以歸隊時，叻哥笑言：「我唔知佢健康上仲有冇問題，因為佢之前做過手術，搭咗個架，唔知得唔得，如果踢波中咗嗰個架呢，我就負責唔起，咁所以呢啲由佢自己啦。（遲啲志偉大把時間同你哋踢波，有傳林家棟頂替佢？）呢啲我哋唔答，我哋冇睇報紙。（你唔敢問佢？）咩唔敢問啫，而係無謂問啦。」