《三個女人一個「因」》面臨倉底危機？ 黃智雯：又唔係鬥快
撰文：郭敏玲
出版：更新：
原定5月28日見街的輕鬆喜劇《三個女人一個「因」》突然讓位，畀年資十年的《蘭花刼》脫塵而出，真的是反高潮。據知《蘭花刼》之後，TVB就安排晶哥新劇《賭城群英會》，幫觀眾護一護眼。有傳《賭》做完，就出重頭劇《同盟》並大造，開始TVB 50周年台慶劇的檔期，直到出年年頭。本來晶哥的《賭城群英會》疑似淪為倉底，拍完後一直都出唔到閘，直到6月中終於有位攝。不過，《三個女人一個「因」》變相就要滯後，目前為止都未有實際日子要出街，一不小心好易變做倉底劇。
據知《三個女人一個「因」》的女主角黃智雯今次出盡十二萬分力拍，因為她在劇中有多重人格，同一時間可分裂成3個人格，做開正經、專業人士的她坦言擔心不能抽離。不過，劇集臨時下架，出街遙遙無期，真係有倉底危機喎！黃智雯說：「拍呢套劇真係好大挑戰，自己當然想畀觀眾睇到自己努力啦，但公司對劇集幾時出到街，都會有適當嘅計劃。我都想有人睇得到，但冚冚聲播一定係好咩？又唔係鬥快！都要講Timing嘅，時勢造英雄嘛！（幾時之內播最好？）唉！呢啲唔講啦！將來嘅嘢都唔知嘅！」
至於男主角袁偉豪，自《城寨英雄》之後，就未再見過佢有劇出街，最近他就忙於拍《棟仁的時光》，他聽到《三個女人一個「因」》似乎有排都未出街，面臨倉底危機，他說：「都唔太擔心嘅。」反而他非常力挺黃智雯：「佢今次做得好落力，好想大家可以睇到佢嘅成果。」他與黃智雯不同的地方，就是想劇集快啲出街，越快越好：「希望年中啦，八、九月我都ok㗎！」不過他都回歸原點：「都係睇公司安排。」
+2