【考古．回帶】陳展鵬是前香港乒乓球隊員 教練離隊放棄打波
撰文：郭敏玲
出版：更新：
講起「前港隊」的藝人，腦海裏一閃而過，必然是方力申，以前風靡一時的「飛魚王子」，如果唔知的話，好打極都有限。不過另一位「前港隊」，有留意的觀眾、Fans會知，或者還會有人未必清楚，原來視帝陳展鵬曾經都是「前港隊」，為香港「乒乓孖寶」同門師兄。去年適逢巴西奧運，TVB都有找他與香港青年隊球員對打，看陳展鵬的球技，還讓人有點眼前一亮。偶像打波咁型棍，癡心的粉絲就有錄低備存。片段裏，雖然對家是小朋友，但是陳展鵬球球有力，敏捷程度都有返咁上下快，簡單對打已經略見水準，相信真正對打會更快更緊湊。
陳展鵬自小就熱愛打乒乓，13歲被發掘，開始在銀禧體育學院接受訓練，之後加入香港青年隊，再大一點就入港隊打波。入得港隊，絕對有返咁上下天份同水準，不過煎pang就話打波過程都唔容易，他在片段講到：「好多人都係打直版，但我就打橫版，所以最初訓練嗰時，成日都輸波，慢慢就有返啲經驗同水準。」入得港隊，其實都係非常熱血的事，陳展鵬因為比賽，經常要穿梭世界各地，而他當時心中只有波，為打波飯都唔食，放學後練波打到夜晚10點先肯走，一打便是5、6年。
既然入得港隊，相信前途都不差，因乜解究陳展鵬後來要放低球拍，在旁人眼中冒這麼大的險，轉戰娛樂圈呢？他表示清楚明白入港隊可以有更大的發展，雖然煎pang認為自家一套乒乓球打法，不是最好，但都最新；只可惜中途眼見教練離開球隊，自己也無心戀戰，最終也放棄打波。煎pang曾經承認浪費了大好機會，加上後來他加入TVB不久，又忽然做歌星，誰不知賠了夫人又折兵，唱片低迷冇得做，拍劇大多做閒角，發現冇乜收入之下，透過之前打乒乓球認識的地盤判頭，入地盤打半年工，直到腳傷先無做，可算是「成在乒乓，敗也乒乓」。