《蘭花劫》畫質太差睇到眼痛 女主角個個凍齡
撰文：溫菁莉
出版：更新：
被喻為「出土文物」的TVB劇集《蘭花劫》昨晚終於首播，久違的「標清」畫質再次重現眼前，因為該劇原是4:3畫面拍攝，所以TVB早前講過會用數碼修復技術，將尺寸變成16：9。但劇集一開始播，網友都馬上留言話「好似睇緊VCD」，「睇到對眼好痛」、「睇到頭暈」，仲有網友指「得字幕係高清」。無論畫質點到好，有不少觀眾都指第一集劇情及各演員的演技尚算不錯，會繼續追落去。
成套劇最多人讚一定係劇中女演員的樣子，田蕊妮與蘇玉華就好似凍齡一樣，完全無走樣，而第一集仍未出現的唐寧，亦是網友重點收看的原因之一。第一集講述蘇玉華飾演的炎沛湖因謀殺養母罪名成立被判處死刑，而女子監獄中，就出現同樣飾演死囚，今年初因皮肌炎病逝的魯芬，之後還有2009年逝世的陳鴻烈，令不少觀眾都非常懷念他們的演技。
除此之外，有網友最關心的「收視」，他們指劇集應該連15點都無，笑指話套劇「又爛又花」要改名做《爛花劫》。但適逢今日是公眾假期，收視結果就要等明天TVB公布才有。