【今晚打喪屍】J. Arie客串 高溫捱熱瞓街 扮喪屍通街咬
撰文：許育民
出版：更新：
改編自余兒同名小說的電影《今晚打喪屍》，由《打擂台》導演鄭思傑監製，新導演盧煒麟執導，將於6月底上畫。該片雲集一眾新舊演員，萬梓良、吳家麗、張繼聰、白只、顏卓靈、王敏奕等，甚具睇頭。
可能是本土製作關係，眾多演員都拍膊頭來客串下，而且完全冇放軟手腳，好似J.Arie，就一於放低歌手形象，化行個喪屍妝，擘大個口追咬張繼聰同白只，單睇畫面，都夠驚嚇。
自認會係怪獸家長
J.Arie予人形象都是一名歌手，《第一志願》、《你死我活》大家都應該有聽過，而其實她都有演戲的，同林德信主演的《死開啲啦》仲係首次當女主角，更提名過香港電影金像獎最佳新人。
來到《今晚打喪屍》，J.Arie最初是飾演小學教師，跟一班小朋友演對手戲，「好多人都話同小朋友、動物演對手戲是最困難，我反而覺得跟小朋友合作，感覺沒壓力。」今次角色是一位嚴師，對着班小朋友好似軍訓一樣，鏡頭後就相處融洽，有傾有笑。以為做嚴師好考演技？其實呢個先係J.Arie最真一面。「我深信若將來有機會做媽媽，定必是一名怪獸家長，我一定會給予他最好的教育，一定會培養他們成材！」
影圈冇「人」緣
雖然在《今晚打喪屍》中，J.Arie只是客串上陣，但也絕不欺場，劇情發展到後來她變成喪屍，要化爛面喪屍妝上陣，仲要30幾度天時瞓馬路，成為喪屍後還要追咬張繼聰同白只，跑足九條街，難怪拍攝時，3位都跑到大汗疊細汗，氣來氣喘。
唔講唔知，J.Arie從影以來，雖然出品不多，但就次次都被安排飾演唔係人的角色，「之前拍《死開啲啦》（演殭屍）同《老笠》（鬼魂），拍到結局時我都變成唔係人，想不到今次在《今晚打喪屍》客串，到最後一刻我都要變做喪屍，看來我拍電影，真係好少做人！」做人好做鬼好，最緊要有發揮，分分鐘今次一咬，俾你咬到個女配角獎返來呢！
+2