傳「阿儀」薛影儀遭雪藏　黃榕即成壞朋友︰我唔會食呢隻死貓

「亞視一姐」阿儀疑似因為跟好友黃榕私自出席活動而得罪公司被雪藏，黃榕今晚（19日）出席《孤注一擲》首映時，她透露阿儀正積極學琴，另外又想補讀跳舞課堂。「佢應該係暫時無工作，希望唔好雪佢，可能公司覺得佢有少少掛住玩而唔做嘢，佢都擔心收入有影響，始終又唔係有錢人。」

對於被指帶壞阿儀，黃榕表示拒絕食死貓。「報道話我教佢遲到5小時，我自己本身唔鍾意遲到，所以唔會教人遲。同埋話安排佢去商業活動做義工，頭一次係，但唔係商業活動，都係派嘢俾老人家，可能公司見有記者就覺得係商業活動，之後啲活動都係主辦搵佢哋。同埋有次話佢為咗玩唔做嘢，嗰次我係唔知佢有嘢做。」黃榕又話曾告訴阿儀事無大小都應同公司講，而她其後與阿儀北上都有告知經理人林寶玉，她一再強調只搵過阿儀做義工一次。