《今日睇真D》51歲陳欣欣公開凍齡秘笈：每朝敷1分鐘面膜

前亞視台花陳欣欣今日（11/9）現身有線電視大樓出席HOY TV獨家直播《杭州第19屆亞運會》開廠拜神儀式。提到現年51歲的她狀況依然神采飛揚，皮膚非常緊緻白滑，被問到有什麼凍齡秘笈，陳欣欣受訪時謙虛表示：「其實我就冇乜秘訣，都係得閒嘅時候去打吓斑，因為我係鍾意做一啲戶外活動，咁所以而家夏天我係暫停打斑，咁就要遮得勤力啲、平時主要都係做多啲防曬，做唔好防曬，係會傷到啲皮膚，皮膚然後就會變乾，所以男士們都一樣要注意。」

對於皮膚保濕護理，陳欣欣笑言：「其實自己都好懶，以前我都有買面膜，買完就咁放喺度，買咗就當用咗。不過近年我唯一會用嘅一款面膜，就係我而家每朝早一擘大眼，就敷上一分鐘就可以撕落嚟，呢個產品話係咁用，佢嘅功能係包埋清潔，保濕等，你話得唔得我就唔敢講，但對於我哋呢啲懶人嚟講，佢係一個『懶人包』，我敷住佢可以去斟杯水做其他嘢，話咁快一分鐘就完成咗，對我嚟講係好方便。」至於飲食方面，陳欣欣表示少食煎炸食物，同埋少飲凍水。