【不懂撒嬌的女人】少年版Gordon楊潮凱睇透頒獎禮：其他台唔爭氣
在《不懂撒嬌的女人》中飾演林文龍青年版的楊潮凱，原來不經不覺已經在TVB打滾了接近九年的時間。最為人熟知一定是在《天與地》中飾演陳豪年輕版的宋以朗，亦是這部劇令他簽約成為TVB的經理人合約藝員。畢業於香港城市大學創意媒體學院的阿凱，讀書的時候一直有玩劇團，不過就從沒想過做電視或者電影，因為他一直專注的是舞台劇：「當時我係想搵香港話劇團有無請演員，點知藝員訓練班請緊人仲會俾錢你讀書，我心諗咁好嘅，我就好無聊咁遞咗張紙上去，Interview咗兩次就入咗TVB。」無心插柳下進入了電視圈，一直浮浮沉沉，說頹不是，因為在之前幾年基本上都有十部劇開工，說紅不是，因為相信觀眾們都未必記得他的名字。
拍完《再戰明天》，得到了外界不少的回響，很多公司的同事和朋友都走過來讚賞，連監制都奇怪為甚麼套戲咁好回響但又好像對阿凱沒有帶來一點點幫助。不過阿凱都很看得開，他說：「運氣喇有時有啲嘢，收視喺觀眾嘅角度可能唔太重要，因為有時網上口碑好都會有人留意，但公司好著重收視，呢啲大家都知喇，喺我立場唔得咪繼續努力囉。TVB有個好處，係黎耀祥祥哥同我講，一套唔得就等下套，盡力喇，只要你每一個過程都盡力去做就得。出到嚟個收獲你係唔會知道，或者根本無收獲，但你要只享受咗過程，就夠喇。當時拍《巾幗梟雄之義海豪情》，祥哥叫我不妨試多啲喇，作為一個新人要努力啲去試，試吓唔同嘅做法、語氣，總之有關表演嘅事就去試，同埋睇多啲好嘅前輩或者好嘅戲，睇完就返嚟試，或者諗吓點樣改變人地嘅方法嚟做。」這一番說話以後就陪伴著阿凱的演藝生涯，當他以後每一個演出的時候都會去試著不同的演繹方法，尋求進步。
經常做別人的年青版，亦常常被指樣貌十分baby face，好像一個長不大的細路，阿凱表示其實自己沒有所謂，只要有戲做，不論年輕版老年版都會去做。不過他都曾經想過自己的臉孔會不會局限了自己的角色，所以拍《純熟意外》之前，他為了能夠更適合地出演一個殺手的角色，便決定留鬚。結果出來的效果幾好，這件事發生之後令他自己也加了一份信心，相信自己是可以做一個比較成熟的角色。到了這個年紀(32歲)，他都希望自己能夠轉型，因為好難再去扮學生，當然作為演員只要監制叫到學生都會照做，但他自己想做一個成熟版的楊潮凱給觀眾一些新鮮感。他相信觀眾會欣賞一些力求改變的演員，因為他有一個信念，就是要從演員和觀眾兩個角度去反省自己的演出，這樣會對於自己的演藝事業更加全面。
入行多年，從未試過在《萬千星輝頒獎典禮》提名過任何一個獎項，阿凱坦言這件事對自己來說太遙遠了，他說：「如果我話無諗過，就一定係呃你喇，獎項有邊個會嫌棄呀？你話我老油條又好喇，獎項喺呢一間公司…（無乜公信力？）其實都有一定嘅公信力嘅，每一個頒獎禮都有佢自己嘅制度，亦都有一班鍾意佢嘅支持者。但對我嚟講我嘅立場係呢度嘅獎項唔係單憑你嘅表現俾你，咁仲要啲咩其實大家都知㗎喇。不過上年張穎康攞獎其實對我係一個好大嘅鼓舞，我地呢班一齊訓練班出身，一齊努力嘅人，原來努力出嚟嘅表現係有人見到嘅，所以我都同意《飛躍進步獎》係最有公信力。當然喇，呢個喺電視台自己搞嘅頒獎禮，觀眾好難要求佢好有公信力，因為係自己搞嘛。掉返轉講，其實係其他台唔爭氣，如果佢地有啲戲可以拎出嚟，可以同TVB去比較，搞一個好似金像獎咁嘅頒獎禮，如果金像獎剩係英皇電影自己搞都無意思喇，我覺得頒獎禮應該係全部一齊砌先啱。」
獎項是一種肯定，亦是一種商業價值，阿凱表示好多時候都是看你的商業價值，他覺得能認真細味演技的人不多，可能十成人當中只有三成人會懂得去分析甚麼位是做得好或差，他說：「大家都會覺得好好睇呀，幾得意呀，個角色幾爆喎，爆乜嘢呢？其實佢地唔會分析，見到床戲就話有J圖，係呢啲啦。不過無辦法，作為呢個行業嘅其中一份子，我只可以努力做好自己嗰部份，到我有能力去改變呢個行業嘅時候，我可以將自己嘅諗法灌輸返俾呢個事業，去改變佢，不過而家我都未有咁嘅能力，我只可以喺自己部份做到最好為止。尤其是拍劇拍影，好多時唔係演員可以控制到，我拍十個take有三個係好嘅，佢專做返嗰七個唔好嘅，有咩辦法？咁當然有人會話你勁就十個take都好喇，但係演員好講狀態，同埋我做得好但你個shot俾咗隔離嗰個，我又可以點？呢個就係我咁耐以嚟明白咗呢個行業係點，有人會問點解呢個機會唔係俾我，我會話因為運氣未到，呢個行業唔係淨係講能力。能力係需要，因為能力係當你爆上嚟時候等你可以持久耐啲，唔係一嘢跌返落嚟。就好似祥哥咁，佢都等咗好多呢，呢一行係要儲返嚟，觀眾一開頭未必留意到你，但當你爆出嚟嗰時，觀眾就會講返以前你做過嘅戲。咁到時你就會明白原來有啲嘢唔係即刻見到個效果，儲返嚟嘅係一個歷練，亦都係演員嘅修養。」
演技從來都不是一朝一夕的事，可能當一個演員在演閒角，甚至跑龍套的角色當中，會怨天怨地自己沒有機會。但萬一真的直接捧上主角，阿凱所說的能力就好重要，沒有實力，給你一個好機會也是浪費，他深明這個道理。他肯等，因為他喜歡，有不少人奇怪他為甚麼不出去做其他工作，但實在沒有辦法，他太喜歡做戲，甚至願意為了去美國進修演技而一個月沒糧出，就是為了充實自己的能力，免得他朝真的上位卻換來跌得更痛。