馬浚偉11月開騷自認面皮厚唔怕跳舞醜怪：我唔尷尬，你尷尬啫

馬浚偉《幸福·春夏秋冬Ma’s Ter Mic 演唱會2023》昨日（5/9）於上環舉行發佈會，正式宣佈今年11月10-12，17-19日於新蒲崗的全新場館「胡李名靜體育館」舉行六場。門票明日正式公開發售。

馬浚偉（馬仔）提到今次演唱會身兼四職，包括監製、創作、藝術總監及主唱，並且打破傅統演唱會，是融合了「音樂藝術」x「視覺藝術」x「沉浸式」的藝術作品，令到每位入場的觀眾沉浸在幸福之中享受全個演唱會。

馬仔受訪時表示：「原本劇本我就冇寫到跳舞，但後尾諗吓諗吓又覺得喺嗰個位應該同個舞蹈者有互動會好啲喎，於是就安排自己喺嗰一幕度跳舞。（你演戲就叻，跳舞得唔得㗎？）我以前就好怕嘅，因為我跳舞唔叻，但而家我就唔驚嘅。係乜嘢啟動到我運動神經呢？就係打羽毛球，因為打羽毛球係需要經常伸展，變咗原來呢樣嘢係會對自己有幫助，加上而家人大咗，變得好唔怕醜，面皮超厚，如果我跳得唔好，我唔尷尬，你尷尬啫，我使乜驚啫，你好意思嘅咪你笑囉，但始終我就唔會排啲難嘅舞為難自己，因為我呢個騷純粹係一個喜劇嚟。」