少林足球二師兄係李寧師弟 試鏡喪做湯馬斯迴旋：星爺點下頭就走
「點解我老豆唔係李嘉誠？」「點解我生得咁靚仔，但係要甩頭髮？」《少林足球》的二師兄一邊洗碗、一邊對住星爺和達哥說出的經典對白，相信每個人都記得，但未必好多人認識二師兄叫莫美林。自《少林足球》後，外號「旋風地堂腿」的二師兄亦拍過不少電影、電視劇，現他身在横店拍劇，亦抽空接受《香港01》訪問，原來當年能夠和星爺合作，全因為他懂得湯馬斯迴璇，他說：「有日劉家榮師傅問我係邊？想你見一個人，當時我飲咗酒，諗住返去訓，但劉師傳叫到就去啦，去到酒店就叫我表演湯馬斯迴旋，當時好醉做唔到，我後尾先知原來周生喺度，佢帶住cap帽、口罩，跟住，第日訓醒去場地，再見佢，做到喇，做咗‧.....做咗幾組，做咗十幾廿次湯馬斯迴旋畀佢，加埋差唔多成百下（佢咩反應？）冇乜呀！點下頭就走咗，佢好嚴肅，劉師傳話周生想搵個識湯馬斯迴旋嘅武師，但又識做戲，但未知咩原因，我就係咁入咗組。」
李寧師弟入過國家隊
做湯馬斯迴旋對莫美林一點難度都沒有（除了飲醉），因為他8歲已加入廣西體操隊，全國體操中獲全能第六，90年被選入體操國家隊，李寧是他的師兄，他說：「李寧係我師兄，我細佢兩期，我8歲入廣西體操隊，25歲退役，做咗兩年體操老師，想搵啲突破呢？經朋友介紹入咗行，第一套我就做大奸角。」由於識湯馬斯迴旋，莫美林順理成章在《少林足球》有機會表演，他在戲中用體操踢波、沙地狂操湯馬斯迴旋，亦是親身上陣，他說：「嗰場戲第一次拍嗰陣，我個膊頭就受傷，痛到訓唔到，好彩第二個先再拍，呢件事我最記得。」
師兄弟一人一句 造就經典對白
二師兄除了那句經典對白，地中海髮型亦是笑點，原來都是出自星爺手筆，他說：「我當時拍完清裝，周生見到就話就咁啦，但前面整返兩條頭髮「斑」過去，都唔知原來咁好笑。」和星爺合作的，大部份不歡而散，或者之後數臭對方，但莫美林對星爺一直十分尊重，亦感激對方，他說：「佢唔係好出聲㗎，但熟咗啲，其實好玩，會埋嚟，『喂、今日有咩玩呀？』嗰場洗碗戲，其實當時冇劇本架，導演、幕後、星爺、達哥；田生、我呀，圍埋諗，每人都要諗一句點解乜乜乜，我都講咗句......但唔記得咗，『點解我老豆唔係李嘉誠？』係周生諗嘅，其實拍嗰陣好靜、好嚴肅、冇人笑㗎，但出到嚟就好好笑。（你當時知邊個李嘉誠？）梗係知啦，咁出名。不過而家我就真係冇咩頭髮，但都係靚仔......哈哈」
莫美林外表粗礦，但為人風趣，亦有個花名叫貓仔，他說：「你講莫美林行內啲人唔知邊個，但你講貓仔，佢哋就識，呢個名係以前玩體操嗰陣人哋叫，因為成日撻落嚟，我又即刻上返去，啲人覺得我好似貓仔。」《少林足球》沒有交待二師兄的感情綫，但現實中他有一仔一女，他說：「太太係以前體操隊時候識嘅，（佢睇過《少林足球》有咩感覺？）佢...佢沒咩感覺，又唔覺得特別好笑，可能佢慣咗啦，仔女都有睇過嘅，覺得我都幾好笑，其實星爺係我偶像，我最鍾意係《鹿鼎記》。（𠲖家仲做到湯馬斯迴旋？)而家我仲做到㗎！」