愛回家｜徐文浩被雪藏？今缺席活動 單立文：熱戀緊都要含蓄少少

單立文（豹哥）今日（23/8）現身將軍澳電視城出席無綫處境喜劇《開心速遞》宣傳造勢活動。提到同劇演員徐文浩近日與性感女在的士車廂纏綿親暱，惹起網上熱議。豹哥接受《香港01》訪問時笑言：「其實我就覺得冇人影到就好地地，有人影到就做咗個新聞，而條片都只係影到對情侶喺度繾綣星光下啫，好多時都係咁。」

咁所以大家而家知道啲車Cam咁發達嘅話呢，大家就要注意多啲，就算熱戀緊都要含蓄少少囉。（佢話飲咗酒？）嗱，我就唔飲酒嘅，點解我戒酒呢？係因為有次飲大咗，就咁應承同我老婆話結婚，咁大家就知咩事啦，自此之後我係一滴酒都冇飲過，我嘅一生就咁畀杯酒就咁搞掂咗。（徐文浩都係！）你點知！（今日唔見佢就知，係咪被雪藏？）唔好講呢啲，我真係唔知，而我覺得男歡女愛，公司雖然話唔好咁明目張膽，但始終佢哋身體就好誠實。（有冇睇過佢條片？）冇呀，我唔鍾意睇嗰啲嘢，我只係睇開心速遞啫，哈哈！」