【Coffee其實幾可愛】林芊妤樂天正能量：用真我去面對才有好結果

舊事已過去3年，Coffee在這段期間雖未有離開娛樂圈，但正職就轉為做瑜伽導師，演藝為副。更自由的時間，更多空間去運用自己的專業，現在於瑜伽方面已有一定成就，近日更為新開台的奇妙電視主持《吾男吾女》，同吳日言與樓南光拍檔講男女愛情。工作日程排得相當緊密，Coffee笑言其實幾享受。「我好enjoy目前的生活，可能性格較為樂天，我始終相信人係美好的，你可以話我傻話我蠢，但我覺得好彩自己有咁樣的性格，才能夠好積極地去面對。我又冇害人，只要努力做好自己，大家總會明白真正的我係點。」她指現今世界透明度好高，一個人的性格好難扮一世，在訊息如此發達之下，如果是裝出來最終都會敗露。

的確，在前兩年被傳媒瘋狂狙擊後，Coffee好快便重新站起來，早前拍住KB（Kevin仔）參演ViuTV的真人騷節目，其真摰的傻大姐個性，搞笑得來頗為討好，網民開始把焦點從她的緋聞和身材移離，並留言大讚「Coffee其實幾可愛」、「呢個先係真正嘅佢」、「原來佢好識搞笑」等，被大眾從挖苦變成喜愛，Coffee表示非常開心。「我當然有失落過，你問我是否禍得福，我只能話如果有得選擇，都唔想發生嗰件事。但從中我真係學到好多，而且明白把口生在他人身上，控制不了。個世界有好多言論，我一定要正面、用真我去面對，大方咁回應，先會有好結果。」

食魚蛋被指折墮

Coffee明白社會都太大怨氣，好多人上網想發洩一下。「我試過出一個post寫錯字，被網民留言鬧，唔知點解嗰一刻又好真心咁去回應佢：『多謝提醒，我會改』然後那位朋友pm我，表示自己只係隨口說說沒想到我會如此誠心回應，見到佢咁講我好感動，原來自己擁有正面訊息，大家係收得到。」從此之後，Coffee就更努力去發放正能量，她最推薦大家做運動減壓，行山同瑜伽是首選。

「前兩年，曾經試過在街上食魚蛋，突然有個記者過來問我：『做乜咁折墮要食街邊嘢？』我覺得好奇怪，有什麼折墮？食串魚蛋好平常，我跟她講這魚蛋真的好好味，更請他一齊食，最後那篇報道沒有出街。」言談間不停哈哈大笑的Coffee，似乎就是以這種心態一路走來，她表示現在的生活好充實，但沒有請助手，因為自己仍能應付，沒必要刻意做排場給人看。最後筆者笑指她說話好急速，Coffee即謙虛說：「是嗎？好，我以後會注意，多謝你提點。」

場地提供：CATALUNYA.HK