阿七吳嘉儀正式做人妻　被老公取笑連煮公仔麵都唔太掂

「獎老」阿七吳嘉儀今日（13日）舉行婚禮，陳煒、李旻芳、同老公黃燿英、黃建東、陸浩明、胡惠康、翟威廉、吳偉豪，蘇韻姿、莊思明，游嘉欣等人均有到賀，場面熱鬧，

由於婚禮儀式在戶外舉行，一對新人接受訪問時表示當初最擔心就是天氣問題，幸好今日尚算天公造美。阿七透露由出門到婚禮現場，已經有不少喊花妝時刻。「同媽咪好真情對話，因為已經搬咗出嚟好多年；另外就係嫲媙了咗心願，睇到我出嫁；同埋睇到老公瘦咗好多真係好感動。」在旁嘅新郎豬仔Leo 表示為到可以著衫好睇啲，故之前有跑步keep fit 。

豬仔又分享自己嘅愛妻宣：「七點起身煮早餐、洗廁所、粗重嘢我負責晒。」提到煒哥大讚阿七嘅煮藝，身為最大用家嘅豬仔表示。「如果計有進步空間，佢有75分，佢之前得50分，啱啱識佢時煮公仔麵都唔得，而家唔係食落肚咁簡單，係擺位都好好。佢真係有心機嘅，湯佢會一路煲一路試。」

問到生B計劃，豬仔表示老婆以事業為重，故一切順其自然，阿七聞言後即謂「我無咩所，好多同事生小朋友後仲旺。不過首先要夾期，我哋結婚都要夾時間，我等你邀請。」