【架空OL日記】盡數公司會見到的5種同事　女人最憎男人未必愛

1. 白目同事

不怕神一樣的對手，最怕身邊的白目同事，總會在不自覺的情況下激嬲成村人。「白目」，簡單解釋就是不懂睇面色做人，劇中的社會新鮮人紗英就是完美例子，入職年資最淺的她個腦諗乜把口就講乜，得罪「老屎忽」已是基本，向同事推薦漫畫時一口氣將20本漫畫帶返公司，英知本來是隨口搭話，見紗英盛意拳拳不好意思拒絕，唯有乖乖地抬返屋企睇，因而幾乎扭傷；收工幾個同事相約做gym，齊齊上磅量體重，但紗英卻天真地在增了磅的知英身邊猛話自己瘦了，令對方即時黑面，果然一絕！

2. 老屎忽

世界上有種生物叫老屎忽，生是公司的人，死是公司的鬼，準備攞終身成就獎咁款，特徵是極自大、鍾意擺款兼恰新人。酒木前輩的老屎忽指數每集都創新高，無論同事傾咩一定要加把口傳授個人見解，加插人生哲理，興趣是針對公司食物鍊最低層的紗英，聽到她笑同事收工趕去拍拖，就即時起槓，「點解你從來都唔問我收工係咪去拍拖，你又知我無？」聽到即時想反她白眼。

3. 消失的同事

消失的同事聽落好有神秘感，其實就是有異性冇人性。這種同事只會在工時之內見到，一到食晏就消失，收工一枝箭走人，逢年過節約食飯永遠無份，「唔好意思，要陪女／男朋友，下次吖，一定。」下次下次，下次大概可以……

4. 最熟悉的陌生人

公司有一個人，一換造型你會知，成班同事開口埋口都會提起，他就是腦細。銀行副經理羽田是英知跟同事茶餘飯後的話題，無論是他的隱形眼鏡，還是跟同事的每句話都要熱烈討論一番，自己媽媽幾歲都要諗諗先，但腦細前日講咩撩秘書你就一定知，不過幾了解都好，對腦細總是避之則吉，睇我唔到就最好。

5. 朋友仔

最後一款隱藏的限定版同事就是老友。在同一間公司共事未必一定做到朋友，英知跟大部分同事都有偈，但唯一認證的就是真紀，二人任何話題天南地北都可以傾一餐，由口味到性格都合拍，講起同事是非，真紀只要講人名，英知已經可以接話。