專訪｜洪嘉豪享受現有步伐　並非不上進：係世界唔允許我力爭上游

洪嘉豪（Kaho）推出以「水」為主題的專輯《Cleanse》，內裡收錄記錄片他出道5年成長故事，影片中Kaho提到有人說他這幾年的路程如同《全民造星》時，他說：「我係真人版嚟㗎。」

這位參賽者預估自己大概會在60強止步，原因是自己的性格以及歌曲風格並不屬於輕易獲三燈。「輸蝕㗎，所以我從來無參加過比賽；喺呢個社會上，總會有啲人係慢熱啲、冇咁自信，而我就係代表住佢哋去說話或者唱歌。」

我應該好快出局

「某程度上，你可以視每一次表演為比賽，只不過對手係自己咁解。我應該係會好快止步，因為我表演會慢熱啲，而比賽好講嗰幾分鐘做啲咩，而我又唔係聲嘶力竭嗰種，所以我應該係……60強左右。」雖然自知輸蝕，但洪嘉豪似乎挺享受現有的位置，他認為社會上總有不夠自信、慢熱的人，而他正好代表這群人出來唱歌／說話。

世界令你不自信

作為一位藝人歌手，洪嘉豪的自信似乎永遠都不會是百分百，情況就如當提到今年情人節推出嘅《My Secret Park》時，他表示「成績好好，都係意想不到」；以及之後的《洗面》，他說：「我係有信心，但平台播放keep住高位，我都唔係好估到。」他解釋說:「有啲嘢唔關上唔上進事，而係我力爭上游時，世界唔允許。」唔允許嘅，是否包括埋獎項？「有得拎當然開心，但就好似我剛剛所說，平時啲歌喺平台數據榜排第10，而今次排第2、3我都已經好似拎咗獎咁。又可能係我已經忘記攞獎嘅感覺，太耐冇上頒獎台，有少少遺忘原來都可以上去。不過拎獎係365日嘅作戰，而唔係一兩個月嘅事，同埋都唔係我一個人嘅工作，公司同事都要做好多嘢先去拎一個獎。」

努力做街坊生意

為怕筆者誤會，洪嘉豪非常努力解釋拎獎與否並非想就得：「我呢兩年的作品，好多年輕人都會聽，但又未有能力拎獎，我喺另一方面都得到咗好多聽眾，多咗人支持我，兩者如果……都兼顧唔到，我只能揀其中一個plan。再現實啲講，全公司20位藝人，（電台）係唔會頒20個獎畀你，所以係好睇大家點plan，同埋一直做開街坊生意，暫時未有轉plan計劃。」入行5年，洪嘉豪在出道第2年已經歷了低谷，但他仍然自覺是幸運：「總會有呢啲日子出現，只不過我出現喺頭兩年，好彩好快行出嚟。如果兩年前你問我總結應該係會唔開心，但而家係開心，可能心態唔同咗。我其實都算係有運氣，因為你可以遇唔到。」

Hair | Haysses Ip @ HAiR @heixx_

Make up | Circle Chong @circlexoo

Outfit | @harveynicholsmen #HarveyNichols #HNOnline @amiri @ragandbone