《警訊》堅哥做20年奸人 「御用騙徒」有正職：阿仔唔鐘意我呃人
最新一集《警訊》可謂是充滿驚喜，本來平平無奇的中年愛情故事，後來驟變拜金父親想女兒釣得金龜婿，再來一個反高潮，引出切勿高空擲物的信息，真是意想不到。有不少網民譏笑：「TVB應該要請呢個編劇返嚟寫故仔。」與此同時，有導演杜汶澤都有指住條片嚟笑，話製作唔太得。姑勿論製作如何，至少引起大眾注意，或者這就是曲線呼籲效果。
除了劇情爆笑，劇中的拜金老竇，自稱「警訊堅哥」都非常出色。堅哥，本名吳良榮。基本上是《警訊》御用騙徒，大多數都是擔正做男一，究竟他是何方神聖？原來堅哥由1997年開始拍《警訊》系列，做足騙徒20年。講起當初入行經過，堅哥就輕描淡寫：「20年前就認識一位導演，咁我就做佢嘅助手。除咗做戲，都仲要執頭執尾，到後來港台轉制，我就剩係做演員，做到而家。」除了是「御用騙徒」，堅哥本來有份正職，從事醫護行業，主要照顧病人，「騙徒」只是Part time。
入行20年，堅哥的資歷與綠葉無異，不過兩者最大分別，就是堅哥話：「其實拍《警訊》唔使點捱嘅，相對比較舒服，輕鬆地拍下案例咁。如果要講去捱，我未做《警訊》之前，就真係要捱啦。」堅哥做演員之前，原來是龍虎武師，真係估佢唔到。可惜想打聽更多堅哥的辛酸，堅哥婉拒：「唔好啦，都係好耐之前嘅事，不如講返《警訊》好過。」據知堅哥未做《警訊》之前，做過亞視特約演員，在《我和殭屍有個約會III之永恆國度》飾演過殭屍。
做足騙徒咁耐，堅哥笑言做得最多就是電話騙案。做得多會否因此而變得醒目，不輕易受騙？他說：「都係嘅，不過我又覺得好難避免，因為要呃你嘅話，可以有好多手法嘅，所以咪要拍多啲片做《警訊》囉。」但講到《警訊》的拍攝手法遭到恥笑，堅哥就話：「其實好多都係案件重演，只係表達嘅手法唔同，性質係一樣，但細節呈現方法就唔會咁古板，盡量想佻皮啲、輕鬆啲。」不過堅哥講講下，就話：「有時《警訊》出咗街之後，騙徒反而會抄返我哋橋轉頭，同類型嘅案件會多咗。我見到都會心噏，尤其是見到有啲老人家畀人呃，因為佢哋可能冇睇，所以都要靠大家幫幫忙啦。」
除了是「御用騙徒」，堅哥在現實中已有自己的家庭，有一個正唸小學的囝囝及讀大學的囡囡。每當《警訊》一出街，堅哥都會同囝囝坐埋一齊收睇。眼見爸爸上電視，囝囝最初都會有疑問，堅哥說：「我喺佢心目中係好人，但佢見到我喺《警訊》又偷嘢，又蝦蝦霸霸，有時仲要攬住第二個女人，佢就會覺得好尷尬，唔係好鐘意，我就要慢慢同佢講清楚。」至於會如何解釋，堅哥：「我會同佢講，都係拍戲啫，目的都係想啲人唔係受騙，佢聽完之後慢慢都接受咗，佢啲同學仔都知道㗎，都覺得冇乜嘢。」