直播拒載的士司機唔驚警察　林子博：聽講佢哋揀遊客載　

無綫藝人林子博昨晚在Facebook專頁，拍片直播尖沙咀廣東道的士拒載情況，當時子博聲稱該處的士「有冇冚旗都好，都係唔載嘅。」跟着鏡頭對着其中一位的士司機，問對方「上唔上得車呀？」該名正想點煙的司機，表示「我唔上呀，我依家休息呀，(休息但係冇冚旗？)唔冚旗犯法呀？」當子博呼籲網民給他投訴電話，該名司機神態輕挑，更說：「Ok呀，快啲叫差佬嚟。係呀，一定嚟，吹我呀。」而他駕車離開前，更拋下一句「個個都接，係唔接你。」

片段出街後，不少網民也支持林子博，叫他投訴的士業的害群之馬，而子博接受《香港01》訪問，事隔一晚他的怒氣仍然未消，他說：「拍片嗰架已經係第4架的士，當時一家人過海返屋企，頭兩架都冚旗，咁冇法啦，到第三架司機冇冚旗嘅都話唔去，再問第4架都拒載，當時我忍唔住問「唔去擺喺度做乜。」佢答我：「你理我啫，我等朋友，等朋友一定要冚旗？」佢態度唔好，我先忍唔住拍片。

林子博還慨嘆說：「香港的士業係咪真係要俾人睇死呢？」雖然該名的士司機，囂張地叫子博報警，但當時子博未有行動，「在於我嚟講，我又唔會咁樣浪費警力，唔係咁用㗎嘛，唯有記低車牌，搵交通投訴組投訴佢囉。」問到子博對方拒載原因，子博表示：「我有啲朋友喺尖沙咀做嘢嘅，呢個問題好耐㗎啦，佢哋會揀遊客，因為嗰一帶好多遊客嘅，例如去蘭桂坊嘅，要加200蚊喎。當然我唔知係咪真係咁，都係聽返嚟。」

在經過拍片事件後，第5架的士終於肯載客，但也要預先問過目的地，子博前後花了半小時才跟家人上到的士，「我就話唔趕時間啫，如果撞啱有人趕時間救命點呢？」問到子博可會跟進拒載事件？他說：「有好多人建議我，可以舉報佢食煙，去控煙辦投訴佢，但對我嚟講一件事還一件事，我覺得拒載係最大問題。依家上網都可以投訴，差人會跟進，有時間就直接去灣仔總部投訴科。」

雖然有不愉快經歷，但他卻說至今仍未試過改搭Uber，「有咩方便得過搭的士，Uber咪又要call又要等，而且我覺得都要對的士業公平啲，的士牌唔平，司機又要考牌，冇理由Uber咁容易入咗嚟。」不過問到子博有何建議給業界，他亦無奈表示：「除咗自律真係做唔到乜嘢，差人間中放蛇冇乜用，不如整個扣分制，俾人投訴得多，扣晒分就冇得揸。」的士業界出現害蟲，作為普羅大眾遇上拒載情況，一定要勇於舉報，絕對不能姑息。