唐詩詠靠法國演技大師Philippe Gaulier教路 顛覆「方法演技」
TVB劇《不懂撒嬌的女人》成為近期熱話，除了是4K拍攝、故事寫實之外，演員同樣都是重點。尤其是飾演凌禹勤的唐詩詠，最初與賤男Hanson之間的感情瓜葛，直到與Saving互生情愫，當中所需的情感表達，被網民盛讚做得細緻，演技方面評價為大躍進。而早前唐詩詠接受著名博客游大東訪問時指，她曾在馬來西亞上過法國戲劇大師Philippe Gaulier的短期課程，在堂上巧遇同樣師承Philippe Gaulier的甄詠蓓（Olivia），加上她上過大師深奧的課後，有心結未能打開，惟未有時間再赴法國學師，於是就跟Olivia學師。
現年74歲的Philippe Gaulier是法國著名的戲劇大師，除了有「The Clown Master」之稱，對於如何演小丑演得淋漓盡緻非常了解外，他更被喻為全世界最具影響力的表演導師之一，真心堅過石堅。醉心戲劇的人聽到他的名字，就會話佢對學生要求很高，態度傾向嚴厲。如果學生做得唔好？唔好意思，Philippe Gaulier不會畀面你，好似達哥咁，用言語「一嘢轟落去」。看過他上堂教學生的影片，他還真的說：「You are nothing！I want my money back！」（你乜嘢都唔係，我係觀眾我會要求回水！）據聞大師mean的程度，就是鬧學生時所用的字句絕不會是一式一樣，即是你永遠都估佢唔到。雖然如此，但依然有不少好戲之人都跟他學做戲，如香港影帝黃秋生、奧斯卡最佳女主角Emma Thompson、《皇上無話兒》的影帝Geoffrey Rush等，而他的愛將更是詹瑞文與甄詠蓓。
另一方面，講起戲劇，大家都總會想起史坦尼斯拉夫斯基（Stanislavsky），他那本《演員的自我修養》深入民心，教大家做戲要先觀察，消化完再加自身經歷再表演，即是由外到內再到外。不過Philippe Gaulier的看法大相逕庭，他認為做演員不需要追求所謂的「真理」，而要在舞台上製造謊言與驚喜。據徒弟甄詠蓓所說，Philippe Gaulier周不時在堂上提起「對家」，笑言：「So Boring！Not That Funny！」因為大師總喜歡令課堂氣氛變得快樂，利用恥笑讓學生可以完全放低自己。
戲劇老師甄詠蓓提起唐詩詠，即非常雀躍。她透露與唐詩詠的相遇，就在她師父Philippe Gaulier在馬來西亞舉辦的短期課程：「嗰時諗住探我師父，之後見到詩詠，就覺得咁熟口面嘅。然後去到洗手間，就見到佢，佢就主動同我打招呼：『你好我係唐詩詠呀！』佢都有講一直有留意我嘅作品。」因為Philippe Gaulier出名態度嚴厲，詩詠當時私下都有同甄詠蓓講好驚，不太敢在大師面前做戲：「咁我就鼓勵佢，難得有咁嘅機會，畀大師鬧下都好啦！加上個course比較深，我都有幫手解答佢嘅疑難。」如是者，唐詩詠事後有傳過信息給甄詠蓓：「詩詠有同我講師父都有話過下佢，但佢就覺得鬧完好爽，對戲劇方面仲越來越有興趣，之後再講落去，佢都有話想上我嘅堂，加上洪永城都有上過我嘅堂，後來我開班，佢都頭幾個學生報名。」
甄詠蓓大讚唐詩詠條件好：「佢真係好聰明，而佢係我學生入面少數咁純品嘅，對演戲都非常有熱誠，情感都非常豐富，好多時候佢諗下諗下就好容易眼濕濕。」同樣師承Philippe Gaulier 的甄詠蓓，都曾經被老師批評過，她笑說：「佢鬧我哋都真係為咗我哋好嘅，以前佢會話：『你都真係好一嚿垃圾！我係觀眾都唔會想睇你呀！』係有啲人會畀佢話到喊㗎！但喊都係好事，起碼知自己邊度做得唔好嘛！」而Philippe Gaulier將會在8月來港開短期班，相信唐詩詠都會mark實去上堂！