「畀家用似被追債」網友熱討　最佳人妻孫慧雪：開心唔使計到咁足

上班族之中，有不少人綽號是「長期糧尾」，每每未到月尾已經叫苦連天，不過無論自己捱得幾辛苦，每月出糧也會自動自覺俾家用，成為打工仔的必然開支。近日有網民大呻自己減少俾家用，即跟家人關係開始變差，甚至有被追債的感覺，可說是家家有本難唸的經。準媽媽孫慧雪知悉該名網民苦況，即勸告對方「始終都係屋企人，真係攞個心出嚟講自己嘅計劃，我諗佢哋都會體諒嘅。」

該名網民開post，講述自己每月苦況，出來工作後每月例必俾8千元家用，但最近轉了新工，加上開始計劃將來，想儲多點錢，隨即將家用調低，該名網民表示跟着其父就經常「溫馨提示」，「今日幾多號？出咗糧未？夠鐘俾家用」，又追問為何減少了家用，該名網民大呻「話題就只有叫我俾錢，好似追債咁，佢愈追，愈老奉，我愈唔想俾。」該名網民更說上一代自私，冇錢學人生仔累人一世，更說因為要養家，最終完全儲不到錢，要窮足九代，該名網民的負面情緒可說爆晒燈。其他網民紛紛留言，有指責樓主「食屋企住屋企，梗係要俾家用」，亦有力撐樓主「窮人一生父母債」，在俾家用的態度上，在網上引起熱烈討論。

網民呻俾家用似追債：

準媽媽孫慧雪接受《香港01》訪問，她表示其實家用是心意，不在乎多與少，「屋企人都好好嘅，佢哋都覺得係心意啫，可以話係回饋屋企人嘅心意，佢哋對幾多錢唔介意，有俾已經好開心，收入嘅四分一左右。(如果自己需要用錢，或者有其他儲蓄計劃呢？)其實賺多啲咪俾多啲囉，但呢四分一就一定會俾，至於如果有嘢想買，都係自己慳啲使啦，依家結婚之後都繼續有俾四分一嘅。」

現時阿雪已經成為別人太太，又準備當媽媽，在家用方面角色逆轉，可會向老公追家用，她笑說：「我又冇喎，咁大家都有自己工作，可以公一份，婆一份，好多嘢唔使分得咁清楚，有時我俾吓，有時佢俾吓，例如去旅行，佢俾機票酒店嘅，我咪俾使費囉，咁就大家開心，唔使計到咁足嘅。」沒有問老公拎家用，那麼平日的生活使費呢？「我哋都係一人一半咁囉，但又冇話劃死要幾多錢，例如我今個月買咗梳化，佢又可能買返其他嘢，所以我冇追家用嘅壓力，唔怕傷感情。」

不過作為準媽媽，阿雪也有自己的計劃，希望夫妻一起儲錢給BB將來讀書，「BB出世之後啦，都會開聯名戶口儲點錢，大家入錢落去都係俾BB將來用，但都係講緊能力做到嘅，大家又舒服嘅，唔好俾大家壓力囉。(要求老公儲幾多錢？)一個月每人放2、3千落去啦，冇乜壓力嘅。」家用多寡往往視乎當事人的經濟，但始終是對家人的一份心意，但如果為了家用而傷感情，想真點又確是不值得。