【不懂撒嬌的女人】林文龍宣萱破膠劇 無綫要大改革：返唔到轉頭
無綫劇集《不懂撒嬌的女人》標榜全實境兼4K拍攝，播出短短一個星期已有好大迴響，平均收視亦有24點，算是不錯的成績。不少觀眾都歸功於主角林文龍及宣萱身上，唔講唔知原來今次竟是二人首度合作，連他們對這個配搭都感到新鮮。其實他們都有個共同點，就是相隔多年再度重返TVB拍劇，早前外闖 HKTV的林文龍提到今次回巢原因，笑言是因為：「自己拍得太多男人戲，好想試下拍女人戲！」 套劇有咁多女演員，當然是滿足到他這個願望啦!
攝影：符祥定
過往TVB給人的感覺都是「工時長」、「劇集流水作業式」的製作，相隔多年再拍TVB劇集的林文龍及宣萱(Jessica)竟然話：「辛苦絕對談不上，只可以用舒服兩個字。」林文龍直言劇集的所有演員拍完會「返唔到轉頭」，因為全實境拍攝不會出現24小時不斷拍攝的情況：「每日都有兩隊拍攝團隊，所以每天都有足夠時間休息，實際上我們的工作時間只是12小時，唯一是感覺上有點奇怪，好似拍緊TVB嘢但又好似唔係。」在旁的Jessica亦非常同意：「雖然拍攝時間長了，以前拍28集的劇集可能只需2個月，今次就拍了5個月。但我都寧願品質好，總好過草草了事，拎完錢走。」
既然他們講到拍完會「返唔到轉頭」，問到二人會否建議公司將來拍更多類似質素的劇集？前兩年外闖 HKTV的林文龍感受似乎特別深：「當然在hktv拍完之後，才會令我覺得這才是拍劇。無論你是18定22 歲，人是需要有個狀態和休息。好似我們以前咁，可能未拍完一套就已經接住另一套。連最基本的睇劇本時間都無，準備功夫係零，每天純粹是打『天才波』。」他續道：「TVB咁大的機構是需要用這種做法，不可以再是墨守成規用以前『繞埋雙手，係咁架啦』。如果TVB有這種想法，不會演變成有我們這套劇的出現。因為他們內部都知道，要有一個大改革去迎合這個社會的轉變。 」
劇集除了有林文龍及宣萱，另一對王浩信和唐詩詠都引起不少觀眾的關注，未與王浩信合作過的林文龍直言未拍劇前對對方零認識，「拍完之後就覺得佢係乖仔、認真、好勤力。」但令人驚喜是他們特別大讚劇中兩位新人，希望公司可以提和給更多機會他們，就是演繹他們年輕版的江嘉敏及楊潮凱。Jessica指因為他們的演繹方法會直接影響成年版的角色，所以拍劇前都有與他們討論過：「我記得嘉敏聽到後是有些緊張，但她都好用心聽我們建議。」Jessica表示自己做過新人，知道有些時候未必能做到最好：「覺得是工作態度，有無心去學習很重要，你入黎係想做咩，為咩入黎。他們是好難得的新演員，希望公司不會只用其他幾個新人去拍劇，因為他們就是缺乏機會。」
而林文龍另外亦提到譚凱琪(Zoie)同張達倫：「因為劇中他們都有感情線，特別是達倫，他在TVB都有10多年，好少拍有感情線的劇集，看得出他們有種好想做好的心，始終這套是好大突破的劇集，份外都會令他們有壓力。我認為他們可能缺乏實踐經驗，導致有點力不從心的感覺。」他提到張達倫早前曾向他講過希望劇集播出後，可以給予些意見：「睇得出好有心，其實他都不是新人大多不用理會，因為他真的好想好。好多時候機會來到你手，能否掌握還是讓它溜走，都是操縱你手。」
Credit：
場地：千鶴日本料理@都會海逸酒店
服裝：林文龍：Timberland / Harmont ＆Blaine
宣萱 ：Sinéquanone