【不懂撒嬌的女人】高海寧出水勁正　女神歸位：拍7、8次先收貨

TVB首套4K劇《不懂撒嬌的女人》自播出以來，成功引起網民討論不同話題。相信最令網民產生共鳴，就是唐詩詠與黎諾懿這一對，後者親身示範甚麼叫賤到無盡頭，尤其是昨晚那集過份到，明明兩人已經再無瓜葛，點知黎諾懿明目張膽帶埋第三者上屋企，卿卿我我。最萬念俱灰就係，偏偏畀唐詩詠目睹這一切，賤Han仲要一句：「層樓都有我個名！」嘩！睇到觀眾咬牙切齒，有的更感同身受地表示，覺得賤男無處不在。

故事寫實值得讚，不過《不懂撒嬌的女人》的重點，當然是女人！唐詩詠現實中被洪永城私有化之後，就少有性感示人。在《不》劇中，就見她久違地着泳衣游水，此幕已經非常吸睛。不過，這些場面又怎能一人專美？昨晚那集真的好多東西值得睇，就有高海寧在泳池游泳，一幕出水芙蓉，維持了十秒，然後浮在水面與袁文傑交談，完美曲線若隱若現，讓網民都好羨慕袁文傑，點解又可以同靚女游水？！不過唯一美中不足的，就是高Ling這幕時間不長，又沒有上水場面，網民都覺得唔太夠喉，不過依然大讚影得高Ling好靚、甚有看頭。

網民覺得唔夠喉？高Ling接受《香港01》訪問時指類似的健康性感場面在《不》只此一場。講到今次落水場面，高Ling笑言最辛苦的是拍「出水芙蓉」場面：「因為上水嗰下要好靚，加上你會見到又有幾個鏡頭，同埋又有slow motion，所以都拍咗好多次。（拍咗幾多個take？）我諗都有7、8個左右收貨，因為上水嗰下好靠我自己用手潑，都試咗好多個方法，最尾都好滿意個效果，都真係拍得好靚。」除此之外，大家見到高Ling後來游蛙式離開，但原來她不懂游泳：「我唔識游水㗎，都會見到我隻腳係唔識點樣撐出去，不過好在劇組嘅人就安排咗唔太深嘅池，我可以企喺度嘅。加上工作人員喺度，拍上水嘅時候我都只需要潛藏水底，所以基本上都安全嘅。」

高Ling聽到網民大讚好靚，不過就唔夠喉，她笑言：「多謝大家鍾意，但其實我喺劇入面都唔係刻意性感，嗰一場戲最主要都係想話畀觀眾知，我同唐詩詠都係面對同一個人、場面，但點解大老闆會聽我講呢？係因為田蜜呢個角色為人比較圓滑。」高Ling覺得網民的回應好得意：「其實每一集嘅推進，有好多網民就覺得我係間諜，我係咪Gordon（林文龍）派嚟呢？又覺得我對游生（袁文傑）有興趣，所以都幾得意。」而高Ling在劇中偶爾就講兩句普通話，她說：「好多人都知我喺南京大，但一聽到我講普通話講得咁標準，就覺得好奇怪！哈哈！」