馬時亨‧香港情｜張學友被開價9位數做節目評審　自認唔識教後輩

由馬時亨主持的全新訪談式綜藝節目《馬時亨‧香港情》昨日（23）首集請來張學友及有「金曲之父」美譽的張文新擔任嘉賓。張學友除了講到當年由唱歌轉戰拍戲的原因外，亦自揭曾被開價九位數字做節目評審。

曾傳出有製作單位出動九位數字邀請張學友擔任歌唱節目擔任評審及導師，他大方承認謂：「我自己比賽出身，我覺得比賽好唔容易，夠膽企上去唱已經好犀利，我自己好唔忍心話呢個唔得嗰個唔得。」張學友也講到自己本來非正統學唱歌出身，因此他亦坦言不知道要如何教後輩唱歌技巧等，表示以前做歌手靠運氣為主，現在做歌手背後必須具備有系統的支持。

被問到當年由歌手轉行拍戲，張學友承認：「都係被逼嘅。」他表示當時製作第四隻唱片時陷入了迷失期，一張唱片只有一或兩首歌Hit中樂迷，漸漸地大家就不再聽自己的音樂。張學友眼見銷量由廿幾萬跌至兩萬多，作為家庭最主要支柱的他驚覺「死喇，唔掂」，所以有人邀請他拍戲馬上答應，為了生計不得踩入電影圈。