嚴淑明推全新國語歌 唔怕遭人白眼嫌老：有機會就做

嚴淑明（Mandy)全新國語歌曲《一個人的黎明》、《沒有你》今日（12/4）於銅鑼灣舉行發佈會。Mandy表示：「今日暫時推出住兩首國語歌先，手頭上其實都已經錄製咗5首歌，再等我收齊啲歌之後再出實體碟。其實第二首國語歌《沒有你》喺錄製嘅過程係遇到版權嘅問題，公司就打算唔做呢首歌，但我不斷哀求公司幫我搞，最終公司都幫我搞點咗，搵人重新幫我錄咗呢兩首歌，成功面世。」

Mandy續說：「而家有公司幫我出歌，我能夠做到自己想做嘅嘢，我係好感恩同好滿足，始終我哋做女藝人係有限制，因為啲人成日都會講你已經50歲。咁其實喺娛樂圈好多時都會用年紀去限制咗藝人，尤其是係女藝人，好多人會覺得你過咗38歲後，係過咗黃金時期。不過我就唔介意呢啲嘢，而我覺得有機會做，我就當呢個係我最後嘅工作去。」