獨家｜張叔平主理張國榮紀念展場地　憶當年齊通宵捱夜：成日㗎啦

美術指導張叔平與張國榮（哥哥）合作無間，日前他出席有份策劃的哥哥紀念展時，講起以往合作的點滴，指捱夜幾十個鐘冇瞓已習以為常，又坦言兩人喜好近似，很少意見不合。

「繼續寵愛．張國榮紀念展」張叔平是客席策展人之一，亦指導今次展覽場地的設計和佈置，張叔平日前（28/3）現身主禮活動時，向《香港01》分享與張國榮（哥哥）合作的點滴。

哥哥為人出名貪靚又盡善盡美，但很少會否定張叔平的想法，他坦言：「我哋其實好相似，鍾意嘅嘢、要求嘅嘢都好似，所以一拍即合。」兩人由1983年《風繼續吹》的唱片就已經合作，哥哥會給予意見，但相當信任張叔平，放手讓他主理，亦不會堅持己見。講起以往會否經常一起開工到通宵達旦冇得瞓，張叔平表示：「成日都係咁㗎啦，呢啲已經係習慣。」