專訪︱Winka與男友結束六年情 剖白愛情路上致命傷:成日說教

撰文:陳芷穎
出版:更新:

「我怪我責備太多,句句說教如何相愛」,是Winka陳泳伽新歌《一手造成》的歌詞,亦是她與前度結束六年情後的自我反省。一段關係的結束,或多或少都由自己一手造成,「說教」的表達方式成為Winka愛情路上的致命傷,強硬的方式和態度將溝通變成指責,縱然自覺所說的沒有錯,卻為對方帶來傷害。反省過後,將自身愛情故事作為新歌藍本,是提醒,亦是釋懷。分手後比起互數對方的不是,Winka選擇重新審視自己,坦然並毫無保留地向讀者剖白內心世界:「感情狀態我可以好坦蕩蕩,有就有,冇就冇,了解中就了解中。」

Winka坦言今次錄歌最大挑戰是咬字:「原來我廣東話咬字係非常之差」。(梁碧玲攝)
Winka坦言今次錄歌最大挑戰是咬字:「原來我廣東話咬字係非常之差」。(梁碧玲攝)

與圈外男友結束六年情 「說教」成感情致命傷

有別於慘情歌總是圍繞分手後哭得死去活來、對前度念念不忘的故事,《一手造成》唱出分手後的自我反省。去年與圈外男友結束六年情,Winka坦言「說教」的表達方式成為這段感情的致命傷:「佢做咗啲嘢令我激氣,我講嘅方式比較強硬、說教,『你應該點點點、你唔係咁都諗唔到呀嘛』,變咗唔係溝通係一種指責,對方好辛苦,我成日做呢個角色,又覺得好似湊仔咁樣,我都覺得好辛苦。」如果時間能夠逆轉,她最想改變的是說話的表達方式:「有啲說話的確冇錯,但對對方嚟講係一種傷害。」

談到分手原因,Winka以「很複雜、超複雜」來形容,簡單來說就是雙方步伐不一致:「愈講只會愈彰顯到個男仔嘅問題,我唔想喺度講人唔好咁,今日係講我嘅唔好…概括啲講係大家步伐好不一致,好多佢嘅人生步伐同我好唔同,我認為你應該要成長,但你冇成長到。我成日說教好辛苦,做咗阿媽咁,佢亦都好辛苦,因為係咁俾我哦。點解我出面做嘢要咁Tough、家庭成長背景又咁Tough,我返到嚟屋企點解唔可以淨係小鳥依人呢?點解仲要湊住你咁呢?」

有別於慘情歌總是圍繞分手後哭得死去活來的故事,《一手造成》唱出分手後的自我反省。(梁碧玲攝)

六年感情,有嘗試挽回嗎?她坦言沒有,挽回亦只是心中所想的畫面:「因為分手係我講,唱呢首歌感覺都係可惜多過後悔,我好少為自己做過嘅事後悔,冇以前就冇而家嘅自己。」分手難免傷心,硬淨的Winka卻沒有大哭一場:「一諗到有啲位自己好有問題就會喊,但唔會因為分手好喊,咁個分手係我講。」

六年感情,有嘗試挽回嗎?她坦言沒有,挽回亦只是心中所想的畫面。(梁碧玲攝)

自身愛情故事作藍本 強調目前單身

將自身愛情故事作為《一手造成》藍本,Winka直言歌曲是提醒,亦是釋懷:「由呢首歌推出嘅嗰刻,我就放低咗一啲嘢…開心係好多人同我講,佢哋拎咗呢首歌向前度講對唔住,亦都因為呢首歌開始有啲對話。」問到有否就歌曲與前度溝通時,Winka搖頭笑說:「唔使㗎,推出新歌前已經同佢溝通咗。雖然分咗手,不過仲係好好嘅朋友,屋企人咁。因為一齊咗太耐,所以分開咗都係好熟悉大家。」

愛一個上一課,再拍拖時會是一個怎樣的女朋友?Winka笑言不夠膽回答,只知道自己不會急於開始一段關係:「我覺得每日都會有啲唔同,而家係我嘅成長期,我都講唔實再做人女朋友會係一個點樣嘅人。只可以講我感情狀態係,有物件如果OK就了解,但亦都唔會好快咁開始一段關係,快嚟快去我唔會囉。」Winka感覺開朗活潑,率直又充滿正能量,身邊亦不乏異性朋友,外界或許有錯覺她蜜運中,但她強調目前單身:「大家唔好咁老土,同朋友單獨出去食飯、攀石係好小事,我有好多異性朋友,我唔係嗰種好唔同異性相處嘅人,其實我都有同女仔出街…而家係有了解中嘅物件,但係冇拍拖。」

Winka感覺開朗活潑,身邊亦不乏異性朋友,外界或許有錯覺她蜜運中,但她強調目前單身。(梁碧玲攝)

舒服做自己拍拖不避忌 與Marf同日出歌互相扶持

入行後成為公眾人物,更加是偶像組合COLLAR一員,拍拖會很大壓力嗎?Winka直言不會,全因有粉絲的支持:「佢哋覺得我開心就好,感情狀態可以坦蕩蕩、舒服。雖然我係偶像組合,但係我嘅外表、性格,畀人感覺係,我有男朋友又好、冇男朋友又好,大家都唔會傷心。如果我係Ivy(蘇雅琳),有男朋友大家就會好傷心。」可以舒服地做自己,假如拍拖亦不會避忌:「唔會刻意隱瞞自己係咩狀態,我係Enjoy同呢個男仔一齊,喺街度拖緊手唔會刻意縮開,因為對方都會好難受。」

與隊友Marf(邱彥筒)同日出歌,比起壓力和競爭,Winka笑言開心大於一切:「有少少互相扶持嘅感覺,除咗團嘅嘢,大家各自經歷嘅都可以分享,互相都好明大家做緊乜,係一種幾特別嘅倚靠。」她坦言曾擔心新歌沒人聽,但隊友卻為她注下強心針:「佢哋話唔好擔心,一定有人聽」。

與隊友Marf同日出歌,比起壓力和競爭,Winka笑言開心大於一切。(梁碧玲攝)

籲要珍惜K歌 做情歌非為爭獎

《一手造成》是較為大眾化的情歌,亦有人質疑「點解Winka會出一首咁K歌嘅歌?好穩陣喎」,Winka語帶激動說:「千祈唔好睇小K歌,大家由細到大都係聽K歌,你會唔會話陳奕迅嘅歌係K歌,所以唔鍾意聽呀?唔會㗎嘛…要揾到一首Melody超容易入腦、音樂班底係食中晒你想表達嘅嘢,而出到街有迴響,做到人人有共鳴嘅情歌、K歌係一啲都唔容易,大家要珍惜K歌同情歌。唔好標榜係唔好嘅嘢,佢始終陪住大家成長」。

她續指外界或許以為做情歌多人聽是為了爭獎,她澄清並非如此:「我入COLLAR之前已經派過台用Winka呢個名,我今年都冇獎拎,冇得競逐新人㗎啦,除非我有機會拎最喜歡女歌手,靠大家啦真係,哈哈。」但獎項對Winka來說是Bonus,得到樂迷的喜歡、做歌的過程感到滿足才是最大的成功感。

Make up:Percy Shing
Hair:Taurus Lee
Stylist:Exactly the Sam
Outfit:Harvey Nichols Hong Kong,APM Monaco

她續指外界或許以為做情歌多人聽是為了爭獎,她澄清並非如此。(梁碧玲攝)

點撃睇更多專訪靚相:

+12
正在加載