隱形戰隊｜劉佩玥被封為新一代「性感打女」：唔係一朝一夕就得

劉佩玥（Moon) 今日（27/3）現身觀塘出席無綫熱播劇集《隱形戰隊》宣傳造勢活動。提到她在劇中有連場武打場面，加上型爆揸槍與恐怖份子駁火甚為吸睛，被網民封為新一代「性感打女」。

阿moon接受《香港01》訪問時笑說：「其實我覺得做打女呢條路實在太難，並唔係我就咁拍一套劇，又或者兩套劇就可以做到，我好相信我同Tiffany(劉穎璇）都係啱啱先起步，如果真係要講做打女，大家就會一定諗起楊紫瓊。而我想講嘅係作為一位打女，係要用好多好多年嘅時間去成就，而呢個努力同付出嘅血汗，並唔係一朝一夕就得，所以我唔可以話自己係打女，但我好希望之後都會有唔同嘅機會俾我去做，因為我都係好有火嘅，雖然我啲筋唔散，加上我又冇舞蹈底子，只要委派我嘅任務，我一定做到最好。」