【任噏影評】春嬌大解放嚇親人　戀愛中感性與理性點處理？　

《春嬌救志明》作為彭大導手下的第三部志明春嬌系列電影，出晒名講兩性關係好鬼到肉，最緊要係夠晒貼地。雖然近兩集為咗入大陸市場而要加入返一兩位大陸演員，不過唔會有合拍片嗰陣俗味，反而有返一兩個女演員仲令成套戲生色不少，始終你只靠千嬅一個，唔係話佢唔好戲，不過爭咁啲睇頭囉。咁如果你有睇之前嗰兩部前集，咁你一定會捉到彭大導條路。一開頭志明同春嬌一定係好地地，之後發生咗啲事而分開，最後都係覺得大家最好而喺返埋一齊。你話劇情老土咩？有人入場咪得囉！

講返個劇情，一開頭見到堆小朋友喺山區度玩，點知無喇喇開始製造啲恐怖氣氛出嚟，心諗：「我唔會喺入錯戲院睇錯鬼片吓嘛？」其中有一幕係講述個小朋友要喺門口嗰啲放信位度望出去，係要望一個叩門嘅阿婆。嗰一刻我都已經有個心理準備會嚇一嚇，但係又無事喎，又真係影住個阿婆好和藹可親咁。點知一開門就見到個怪獸剩係拎住阿婆個頭，雖然話頭兩集都係玩懸疑嘢開頭，不過都唔使咁重口味啩？當然一套愛情片係唔會發生啲咁嘅情節喇，打咗個完場之後就開始正式進入故事發展。其實劇情都真係好普通，一開頭講佢兩個點相處，又講吓普遍情侶拍拖嘅問題。志明用成九萬蚊買個裝飾返嚟俾春嬌話唔等使，春嬌又偷睇吓志明部手機見到有第二個女仔搵佢又嘈下交咁，這些都是大部份情侶面對過嘅問題，係幾貼地同埋能夠引起共鳴嘅。

不過套戲有兩個位真係有啲頂唔順，直頭係想去個廁所釋放吓我嘅尷尬。故事講到兩位主角去咗旅行，春嬌就為志明準備咗份驚喜，就係著套護士制服同志明玩制服誘惑。點知佢一換咗套衫出嚟，唔好話志明嚇親，係成場觀眾都俾佢嚇親，點解彭大導要咁樣玩千嬅？講真，一個中女要佢著制服唔係問題，咪揀件保守少少大方少少嘅，咁睇落都順眼啲吖。你係都要搵件玩味十足極度Sex嘅出嚟，點解一套愛情戲要咁多重口味位呀？我唔想以後對護士產生恐懼呀！不過劇情需要就無辦法喇，另一個劇情需要就係當春嬌離開志明嗰陣心情極度低落，咁佢一班好姐姐就諗計激勵吓佢，就決定播返首快歌跳返隻勁舞諗住重燃佢嘅心情。睇住佢三位姐妹一路唱歌一路跳舞，嗰度我諗有成分鐘，成分鐘我都不停咁打冷震。相信呢度一定係想製造一個笑位，不過望住佢三個係度唔知做乜咁跳來跳去，生硬得嚟又有點兒浮誇，笑就無出到嚟，反而啲雞皮就出晒嚟。春嬌嘅心情當然燃起唔到，仲爭啲將我嘅心情打沉。不過講開唱歌，呢套戲有成幾個唱歌位，最好睇嘅緊係最後志明當街唱廣東話嘅《春嬌與志明》哄春嬌，雖然係造作同埋誇張，但觀眾好受落，歌詞夠搞笑，又有啲感人位。對比返三位好姐妹嗰幕，真係差天共地。

套戲其中一個最多人討論嘅位，就係兩位主角喺酒店嗰陣遇到地震。志明不停叫春嬌行去匿去枱底，但係春嬌驚到坐咗喺度郁都唔郁，咁志明就自己匿埋咗先再叫春嬌過去，叫叫吓地震就停咗喇。轉過頭春嬌就發脾氣話志明掉低佢自己一個唔理，志明就辯解已經叫咗好多次匿喺枱底，如果天花跌落嚟一個人同兩個人都係死，仲話自己係從理性角度出發，之後春嬌嘅怒火一發不可收拾咁走咗去。事後我同過好多朋友討論，每一個男人都話啱呀，企埋一齊唔通攬住一齊死浪漫啲呀？女人就會話你哋男人唔明架喇，緊係想自己個男人無論點都留喺自己身邊喇。人類有分成男人同女人，明顯就話俾你聽呢兩種人係有分別，除咗身體之外，有唔少人話男人係理性嘅動物，而女人則比較感性。喺呢個例子上佢兩個都唔可以話錯，套戲當然就係志明搞一場大龍鳳出嚟哄返春嬌喇，不過一套好嘅電影係可以帶出一個議題，甚至令人反思，咁如果情節發生喺你身上，你會變成志明或者春嬌，你又會點做？

整體嚟講套戲都幾好睇無悶場，笑位都幾足夠，貼地得來可以輕鬆。最後一幕春嬌驗完孕之後笑笑口咁，好有理由相信佢已經有喜，咁都好有理由估計第四集將會係懷孕之間嘅感情煩惱，唔通會係講志明忍受唔住春嬌大肚其間無得行房而出去偷食？