【絕世好女友】有樓絲打呻男友要加名　朱千雪：尊重女仔意願先

「有樓有高潮」的拜金女Season，曾揚言找拍拖對象要有2千呎樓，隨即被全城熱議。之不過，其實在男女平等的年代，不少女性也能夠自給自足，買樓這些粗重功夫，更加是自己包辦，完全不用假手於男士。對比起找一個肯陪自己食麥記的女友，能夠跟一個有樓的女生拍拖，更是一班雄性冇殼蝸牛的夢想！不過近日有位絲打在網上大呻跟男友吵架，為的就是一層樓！

該名絲打透露她跟媽媽一起聯名買樓，而大部份首期由媽媽支付，兩母女當然不會計較。而買樓後她就一直獨居，至去年她遇上現時男友，二人墮入愛河，之後還發展到同居關係，更計劃明年結婚。可惜近日男友竟提出希望層樓能加埋自己個名，絲打當時回覆要遲點才說，想不到男友竟然大發雷霆，更指女友不相信他、質疑他！該名絲打為此感到很大壓力，更在網上大吐苦水。

有樓絲打的煩惱：

不過網民留言就相當一面倒，紛紛指責該名絲打的男友「好厚臉皮」、「擺明貪妳層樓」、「想又食又拎，好猖狂」，甚至有網民直斥對方想「食軟飯」，勸該名絲打跟男友分手，找個真心對待自己的男仔。網民食花生當然容易，但絲打的煩惱就是有感情瓜葛，但層樓要無端加上男友名又心有不甘，原來做一個有樓絲打都不容易。

擁有2千萬物業的朱千雪，曾霸氣表示「樓自己有，唔使靠男人買」，但若然男友冇樓不特止，還要求加上自己名，卻又是另一回事！朱千雪接受《香港01》訪問，她表示：「呢件事我知呀！咁我覺得要睇返佢哋自己。每個人都唔同，如果佢哋拍拖諗住結婚，我又覺得冇乜所謂，但依家個女仔唔想喎！其實所有嘢都可以商量嘅，作為男女朋友，男仔都應該尊重個女仔嘅意願囉！」

不過若然將來男友向朱千雪提出層樓加名的要求，她即斬釘截鐵的說：「除非係結婚啦！唔係就冇乜必要嘅。」朱千雪提出她自己的看法，皆因拍拖跟結婚又是另一個層次，她說：「若然結婚即係兩公婆啦！又一齊生活，加個名都冇所謂嘅。（使唔使俾返層樓嘅一半錢俾妳？）咁呢啲就到時先啦！依家好難講，但講到結婚好多嘢都冇乜所謂。」雖然朱千雪不介意層樓加上未來丈夫的名，但能夠當上她的丈夫，肯定有相當實力，2千萬物業又如何？