網民建議麥媽媽掌教育局好過陳美齡　麥明詩：我阿媽幾有idea！

近日有傳下屆特首林鄭想找80年代藝人陳美齡接任吳克儉成為教育局局長，這個消息昨日震驚港日，至於為何要選陳美齡？有人推測她和三位兒子都是在史丹福大學讀書，絕對是最強CV；但有人覺得她長居日本，根本不了解香港教育制度，是絕對「堅離地」代表，所以有網友就覺得麥明詩母親更為適合，有人在留言上寫：「陳美齡有幾個仔入史丹福？咁不如唔爭在叫麥明詩阿媽嚟做….」其實這句看落似抽水，實則又不是沒有道理，因為麥明詩媽媽（麥何小娟），現職資深職業治療師，曾在澳洲修讀教育碩士和資優教育的課程，最重要有往績back up，麥明詩會考10優兼劍橋畢業，她的胞兄麥明山中大畢業現職醫生，麥媽媽兩個「製成品」絕對同陳美齡有得揮，最重要是made in Hong Kong。

而麥明詩對網友這句話都很有興趣，截圖放到自己facebook，但hashtag就寫「麥爸爸呢」，麥爸爸當然夠資格啦，他是Band 1學校聖公會林護紀念中學副校長，教書、教小朋友的經驗應該拍得住出書講教育嘅陳美齡啩？麥明詩此post一出，網友都瘋狂留言，不少人都贊成麥媽媽，甚至麥明詩擔任教育局局長。

麥明詩接受《香港01》訪問以WhatsApp回應，她說：「喺網上見到呢句覺得幾得意，所以就同大家分享輕鬆下。如果我媽咪做嘅話，佢都應該幾有idea，因為佢嘅仔女都喺香港教育制度下成長，都好熟悉啦。同埋佢有幫幼稚園嘅小朋友做融合教育，幫過一啲發展比較遲緩嘅小朋友適應學習，所以都有接觸唔同背景嘅學生，下屆都可以考慮下佢㗎，哈哈；至於我爸爸係政府津貼學校做緊副校長，有實戰經驗，知道教育資源點分配，學生有咩需要。如果下屆搵我阿爸阿媽做，一個做局長，一個做副局長，咁就正喇！」

至於點睇陳美齡做局長呢，麥明詩就話：「持開放態度啦。佢本身有唔同背景啦，有讀過教育博士，如果佢做局長，可能都有新嘅風氣。不過都要好熟悉香港嘅教育制度，如果有新嘅idea，但喺香港又可唔可行呢？就好似英國推行小班教學好普遍，而且都有好處，老師都會多咗時間關注自己，但喺香港有冇足夠資源去做？師資班房又可以點呢？好視乎個環境。加上DSE競爭咁大，又會唔會增加大學學位呢？委任佢都有當中原因，都希望佢同佢嘅團隊都會了解下香港學生需要。」