汪明荃心痛蔡天鳳英年早逝：點解香港咁好都會發生呢啲事？

汪明荃今天（26/2）出席《好市民獎頒獎典禮2022》，以一身鮮艷晚禮長裙亮相任頒獎嘉賓，大方又得體！

汪明荃入行多年，為人友善又樂於助人，深受圈中後輩喜愛。今個新年她曾煮一桌美食招待Mirror三子呂爵安（edan）、盧瀚霆（Anson Lo）、李駿傑（Jeremy），汪明荃大讚三人性格乖巧！提到日前Anson Lo（盧瀚霆）出席身體抱恙暈倒，阿姐聞言擔憂表示：「太攰啦，可能啲嘢排得太多（點睇新一代藝人經常做無得休息？）我哋嗰陣時已經係咁，冇辦法，有時忙、工作多，咁你唔夠休息就會，所以唔可以太忙，唯有經理人計好啲時間，咁藝員都要休息㗎嘛。」

另外，提到汪明荃有份出席2月19日TVB賽馬活動，恰巧同日蔡天鳯（Abby）亦有出席，被問到二人有否碰面？阿姐表示：「唔係好留意到，佢有去咩？其實嗰日好忙（阿姐有冇關心呢單新聞？）緊係有啦，因為大家都覺得好恐怖，香港咁好嘅社會都會發生呢啲事（阿姐係咪好心痛？）係呀係呀，咁樣毁屍滅跡，唔知個身體、個頭去咗邊啊，希望快啲破案啦。」