廉政狙擊｜羅霖大膽拍床戲兒子看完大讚：仲話我拍得好靚

羅霖（Candy)昨晚（13/2）現身九展出席電視劇集《廉政狙擊》首映會。提到她劇中為了助老公黃賢智成功投標，不惜為夫獻身賄賂飾演未來都會發展局企業發展總監的蔡康年，畫面非常香艷。

Candy接受《香港01》訪問時表示：「其實我第一次做衰人，係接呢個角色嘅時候諗過，拍完出街會唔會俾人鬧，但而家啲觀眾好聰明，唔會再咁做。而當我收到劇本嘅時候係知道有呢個床上戲，加上知道電視尺度有限，變咗我係唔擔心。而蔡康年我同佢合作過無數次，變咗我對佢非常之信任，拍嘅時候全冇尷尬。不過最緊要拍嘅時候，防走光措施要做足，我係黐晒膠紙打晒底，同埋着晒泳衣，咁所以拍嘅時候係好放心。（拍之前有冇做護膚？）咁又冇，因為我覺得作為藝人，一路都要保持備戰狀態，因為當機會嚟就要把握。如果要等你嚟減肥嘅時候，就會做唔到呢個角色。（仔仔知唔知你拍呢場戲？）佢哋係知道，仲話我拍得好靚，始終佢哋3個都係讀國際學校係鬼仔性格，接受程度好大，佢哋係會覺得冇乜嘢。」