【任噏影評．拆彈專家】拆彈得啖笑 香港人恐襲要趕返工先係重點
電影《拆彈專家》上映了五日，頭三日就錄得450萬票房，成績相當之好。一來警匪片從來都是香港人追捧的對象，二來主角劉德華帶傷都要為套戲拍段宣傳片段，夠晒啅頭贏足掌聲，三來套戲標榜炸紅隧喎，雖然話就話條隧道係搭出嚟，不過都夠晒興奮喇，幾多香港人想炸咗佢等佢唔好再咁塞呀？食正咁多條水，呢套戲大賣絕對係好正常，28號就到大陸上，雖然話部戲用咗成1.8億港幣去拍，不過打正劉德華同姜武兩個大陸響噹噹嘅名，翻兩三倍不是夢喇。
講返個劇情，一開頭見到劉華係賊嗰邊整炸彈，心諗：「唔係啩？拆彈專家都要做臥底？」做臥底都不要緊，人哋華仔辛辛苦苦做完臥底，你仲要擺佢張相上報紙，驚死人唔知佢係臥底咁，話晒班賊都有幾個走甩，使唔使咁自豪先？完全打破晒一般人以為做完臥底係要低調處理，為咩？就係要保護佢人生安全囉。不過都唔緊要，反正幫賊返嚟報仇都係炸佢上司，而唔係炸出賣佢地嗰個，唔係話唔合理嘅，做戲囉！
講咗啲劇情，到講吓演員。作為Chok界嘅始祖，劉華依然維持著佢一貫Chok嘅本色，好正常嘅！發揮都係正正常常無乜特別，不過我就比較掛住《桃姐》入面嘅華仔。至於一年拍足26部戲嘅黑仔姜皓文，作為重案組總督察呢類型嘅警察角色佢已經做到入晒血，仲要係一定係有勇無謀橫衝直撞完全唔用腦嗰類型，不過今次加埋係有心理陰影，大叫大嗌暴走狀態都難佢唔到，又確實做得幾好。近年開始上位拍戲嘅張繼聰，已經開始注入一種「觀眾見到就笑」嘅形象，的確佢一出場戲院就充滿咗笑聲，俾班賊脅持，要認真時又交到戲，希望將來都會見到佢多啲演出。老練嘅廖啟智智叔要做大奸大惡完全難唔到佢，唔太多講。兩大大陸演員姜武和宋佳係大陸票房嘅強心針，姜武演技無人會質疑，就算係大陸演員相信都無乜人會抗拒。不過女嗰位我就唔太有好感，唔係話演技乜乜乜，劉華作為我地香港之子，特首（如果選）呼聲最高嘅人，我覺得大陸點都要拎范冰冰或者景甜呢啲國寶級嘅演員嚟到襯托，但係宋佳雖然只係得36歲，不過淡妝之下完全暴露出佢年華老去嘅皮膚，難聽啲講真係有啲嚇人。
又講返個劇情，最後打終極大佬就係發生喺嗰條搭出嚟嘅紅隧，幾廿個賊，脅持住四百幾個人質，好明顯就係極恐怖嘅恐怖襲擊。作為其餘兩條過海嘅東、西隧，要封閉都好正常呀，點知班賊會唔會炸埋呢兩條呀？點知由事發開始，只係封咗幾個鍾，就話要開返，咩原因？係要俾香港人返工呀！香港呢班奴材即使俾人恐襲都要返工呀！唔怪得啲人話香港係奴性最重嘅地方喇，比著其他國家早就紅色警戒叫人匿喺屋企唔好蒲頭喇。香港人點解奴性咁重？套戲好有心機俾咗個呼應，話說石修係警務處高級助理處長，呢次恐襲由佢指揮，咁大單嘢都唔派個局長指揮下出嚟都唔緊要，我當佢好似我地個教育局長咁成日去旅行。但係佢好少研究點樣去解救啲人質，反而有一幕係同紅隧個設計師研究萬一條隧道真係炸咗會點，會幾耐先起得返一條，會點樣影響香港經濟。作為警方代表，反恐嘅最大實力，竟然唔快啲諗吓點去解決件事，而係去諗真係爆咗點算？都唔知話佢有遠見好，定有幾手準備好。
至於另一幕場面，講述由BabyJohn黃天諾主演嘅人質，被個賊發現佢原來係警察，就要由佢綁住啲炸彈行出嚟。咁套戲叫《拆彈專家》呀嘛，咁緊係滿心期待睇劉華點樣拆個炸彈喇。點知佢居然話拆唔到，仲不停咁同BabyJohn洗腦話「你係差人，你嘅責任要離開人群，離開啲車，將啲傷亡減到最少」，OK，正所謂道高一尺魔高一丈，你拆唔到唔緊要，你要感人位都無所謂，但你又要玩洗腦對白，不停咁重複又重複，BabyJohn明知自己就嚟死都要大聲話我係差人，大佬我真係聽到起晒雞皮。呢個時候戲院內傳來一聲唔小心嘅笑聲，結果搞到全院都唔忍喇，盡情咁笑。最後BabyJohn緊係炸到碎晒，感動壯烈位眼高手低都算，原來呢一幕仲要照抄美國電影《The Hurt Locker》，劇情仲要係一模一樣，不過人地個拆彈專家見到有炸彈都著返套保護衣先，你劉華就咁沖埋去，係咪拍趙子龍拍上癮呀？正當以為劉華係不死身應該最後都唔使死，點知結局係兩個超巨型兼複雜嘅C4炸彈，咁根據上個炸彈嘅經驗，拆彈專家緊係拆唔到彈喇，結果又玩返究竟剪紅線定黃線呢個遊戲。最後劉華同另一個拆彈專家吳卓羲講，如果佢剪完黃線唔爆就再剪，如果爆咗就即刻剪紅線。劉華本著大無畏嘅精神，應用佢「用生命救生命」呢個偉大嘅理念，剪爆咗個炸彈，但問題又出現啦，劉華點解咁肯定兩個炸彈個setting係一樣呢？即係如果另一個係剪紅線會爆點算先，咁成件事咪好無聊？雖然明明條隧道除咗佢兩個就已經無生命，其實今次係「用生命救金錢」，保住條紅隧，等啲人可以繼續塞紅隧返工。
整體來說，其實呢部戲都成功做到緊張感，始終套戲玩炸彈，你都唔知幾時會有嘢爆出嚟。不過劇情方便就真係有啲出事，《拆彈專家》全程只係拆到一個已經封塵好耐嘅戰時炸彈，有兩個爆咗，另一個要掉落海爆，四個拆得一個，啲炸彈咁勁咁高科技，不如都係叫《炸彈專家》算喇。