超級毛特兒大賽｜向海嵐憶述愛犬被襲受傷不禁落淚：腫到成個波

向海嵐（Anne）和周奕瑋（Jarvis）今日（28/1）以評審身份現身柴灣出席無綫J2《超級毛特兒大賽》面試。Jarvis透露今次參賽者共有618名，將會分階段進行面試：「今次真係好犀利，真係冇諗過會有咁多人去參加，完全係超出我哋所諗嘅幾倍數目，真係好誇張。我諗到最後可能揀淨15至20位參賽者留低。淨係揀品種都有排揀，同埋有好多特別嘅故仔。就好似頭先有位主人佢話自己有陰陽眼，連佢隻狗都有陰陽眼，咁所以會有好多呢啲神奇嘅故事。」

此外，Anne憶述愛犬Chloe兩年前被大狗襲擊身受重傷不禁落淚：「其實咬佢隻狗係我朋友隻狗嚟，而兩隻狗係認識又有玩過，但唔知點解嗰日玩玩吓就突襲擊佢，起初以為皮外傷，睇完醫生就冇乜事，點知情況急劇惡化，幾日就腫到成個波咁，要即刻帶佢入院做手術放膿。最令我痛心內疚嘅係，當時我喺國內工作，唔能夠喺佢身邊照顧，令到我好擔心，而家講起我都覺得好對唔住佢。」