陳奕迅冬至紅館門外攬實女兒康堤　父女難離難捨背後原因勁洋蔥

Eason陳奕迅相隔9年回歸紅館，個唱《FEAR and DREAMS》已進行了一半。昨晚（22日的）冬至，有Fans喺完場後，影到Eason同女兒康堤依依不捨擁抱一幕。一開始，唔少網民都奇怪兩父女點解如此難離難捨，其後拍下片段嘅Fans解釋Eason為保持狀態，加上疫情下為怕影響家人，所以演唱會期間，暫時搬到酒店住。

影片所見，Eason同康堤喺紅館門外先係對望，其後似係想攬一攬康堤，但又有少少猶豫，最後康堤主動攬實Eason，見兩父女攬到唔願放手，徐濠縈在旁不停手指指同搖頭，場面都幾搞笑。Eason臨走時，仲依依不捨咁望住康堤，真係隔住Mon都感受到濃烈嘅父愛。