【全職沒女】20歲當華仔MV女主角　姚瑩瑩：華仔叫我肥妹!

姚瑩瑩在《全職沒女》飾演男人婆，超級粗魯，素顏上陣，完全豁出去演，令到網民眼前一亮。其實入行初時她是一位美女，91年她代表新加坡參加環球小姐，與當年袁詠儀是同一屆，二人亦因此成為好友，姚瑩瑩接受《香港01》訪問，之前說了自己在無綫的心路歷程，亦說了入行的經過，她說：「嗰陣我代表新加坡去美國選美，我同房就係袁詠儀，我當時做緊秘書，我又覺得好悶，有啲師姐叫我不如去香港試下啦，我就陪阿靚(袁詠儀)拍嘢啦，唔記得邊套喇，佢第一次同劉德華拍嘅，我嚟咗香港住佢度，好似陪佢返工咁囉，我先見過世面，原來拍嘢要捱夜，無啦啦又會放煙喎，嘩！好神奇。」

【全職沒女】姚瑩瑩由力捧變消失　捱足21年：無工開主動搵監製

因為跟着袁詠儀出入，令姚瑩瑩拍了第一個MTV，男主角更是劉德華，她說：「其實係阿靚同我講，佢話幫我接咗個job，幫華仔拍MV，我問即係要做咩？我話我有啲驚喎，我話要點做㗎？我唔識喎，但華仔真係好nice，好好笑！我記得我仲要着古裝衫，我拍嘅係《真我的風采》，華仔同阿靚講：「我想揾肥妹拍呀!」肥妹就係我喇，因為佢笑我件古裝衫扣唔埋，拍咗兩日，第一日扣唔埋，第二日隔咗成個星期拍，我就扣到喇，華仔仲笑我「嘩！瘦咗喎。我話我好緊張你講嘅嘢，所以係咁減肥。」其實在YouTube看回《真我的風采》，那時20歲的姚瑩瑩又怎會肥呢?，之後姚瑩瑩更幫了郭富城拍了《渴望》，瑩瑩在MV中飾演阿拉伯女郎，好靚㗎！