翟威廉講野球拳原來係最終武學　做埋KOL拍片：嘔心瀝血㗎呢次　

無綫藝人翟威廉，近日也加入了KOL(Key Opinion Leader)行列，不過他有別於其他網絡紅人，不是跟大家分享飲食扮靚心得，而是同大家講歷史古仔。或許大家會有疑問，講歷史會否好沉悶？但從他Facebook分享的短片，由《金庸群俠傳》講到去脫衣野球拳，內容卻相當吸引，原來歷史都可以好Funny。

眾所周知，翟威廉不但是2010年的香港先生冠軍，而且他曾在日本讀書及以搞笑藝人出道，精通日語及熟悉日本流行文化，名副其實是日本通，所以無綫凡是日本旅遊節目大部分也由他主持，連翻譯都可以慳埋。不過要翟威廉當節目的日本翻譯，未免大材小用，近日翟威廉自己搞了一個「翟男天地」，拍攝短片在Facebook專頁播放，近日的短片正是講「野球拳」的歷史。

他由不少7、80後集體回憶《金庸群俠傳》講起，「九陽神功」、「降龍十八掌」去到重口味的「葵花寶典」，如數家珍，但他最想講的其實是「野球拳」，還說是所向無敵的功夫，之後就跟大家分享「野球拳」的歷史，原來出處是1924年，一隊叫「伊予鐵道」的棒球隊，因輸了比賽，所以在對手的慶功宴上，提出以猜拳的方式再決勝負，而教練前田伍健更即興創作一首「野球」歌及動作為隊員打氣，竟然大勝對方，自此「野球拳」成為了棒球隊的打氣之歌，直至70年代，日本電視台(NTV)製作了以「野球拳」為名的猜拳脫衣遊戲節目，竟然大受歡迎，自此「野球拳」亦與色情元素結下不解緣。

翟威廉以講歷史方式成為KOL，方法相當創新，他接受《香港01》訪問，原來他拍片全因無綫的「Big Big Channel」，「TVB搞咗個Big Big Channel，大家都會拍啲嘢幫公司手，算係前哨咁啦，但我自己都要實習吓，所以我就拍片擺咗喺Facebook試吓先。題材上想講啲知識、歷史，或者社會問題，包裝上就用啲懷舊嘅嘢，例如game呀、電影，或者一啲懷舊玩意。全部都係我玩過，或者裡面啲料係我讀書讀返嚟嘅，稿都係自己寫，嘔心瀝血㗎呢壇嘢。」

除了藝人工作，再兼任KOL，是否準備在網絡世界大展拳腳，「吸金都唔係最重要，如果吸金就唔搞學術性嘅嘢，依家吸吓人氣先啦，希望一邊做，一邊推廣吓學術嘅嘢，依家拎出嚟放咗先，第日Big Big Channel容許我擺上去，我咪擺囉。不過選題我都諗過吓，之前《大航海時代》有時太過學術性，反應唔係咁理想，本身第二集唔係講《金庸群俠傳》，而係講吓日本戰國史，但最後決定講「野球拳」，都係歷史，但就Funny啲囉。」

翟威廉直言KOL工作，比拍劇更辛苦，「其實幾花時間，開頭當係兼職咁做，但自己鍾意囉，好似寫稿呀，講吓啲事跡，難度都幾高，平時拍嘢都冇咁辛苦，因為裡面啲圖畫都要自己畫，總之最緊要有人氣啦，同埋可以將我自己鍾意嘅嘢同大家share。」其實人氣KOL收入不比當藝人遜色，翟威廉不如全力搶攻這個市場仲實際啦。