高達迷2萬元買模型女友嗌分手　譚杏藍撐毒男：冇理由剝奪佢人生

男人有時就好似大細路，不少人愛打機、砌模型、儲波鞋等等，對於女仔來說，這些興趣卻往往被視為浪費時間金錢，尤其是到達談婚論嫁階段，因為要儲錢結婚，男友更要半自願下告別這些嗜好。近日有網民分享慘痛經歷，話說他本身是高達迷，正在跟女友儲錢結婚，卻不慎被女友發現他，偷偷用了兩萬元買了高達模型，女友隨即鬧他無諗未來，更嚷着要分手。

該名高達迷面臨分手邊緣，網民知悉他的慘況後，隨即一石激起千重浪，紛紛留言「兩萬蚊好濕碎，女友買手袋都唔止」、「男人愛高達，女人唔明白」，亦有網民同情事主，建議他「掉晒啲高達去挽救關係」、「買返個同等價值嘅手袋俾女友」，究竟是女友重要，還是高達重要？相信事主都不大肯定，亦有網民提議直接識個鍾意砌高達模型的女友，以後就無晒煩惱。

網絡紅人譚杏藍，早前送過波多野結衣性用品給男友，還要問對方試用報告，相當前衛大膽，名副其實是100分女友。她接受《香港01》訪問，知悉該名高達迷苦況，隨即表示，「如果佢哋感情脆弱到用兩萬蚊就分手，其實老早就應該要分。第時我結婚都係選擇財政獨立，因為我就係可能用兩萬蚊買「高達」嗰個，人哋鍾意買乜咪買乜囉，如果結婚前買兩萬蚊高達都唔可以嘅時候，我唔敢想像結咗婚之後生活會有幾悽慘，冇理由剝奪咗佢嘅人生㗎嘛。」

男女大不同，姊妹們買名牌手袋，動輒過萬元，但若然男友用逾萬元掃玩具，肯定是死罪。譚杏藍卻有不同見解，「女人買貴袋，等於男人買車嘅啫，最重要埋單嗰個係自己。搵得到，又使得到，最重要係使自己錢就最好。(部分女仔會覺得買模型等於買嚿膠，花錢又阻地方？)佢哋唔明㗎啦，嗰種係情意結，可能細細個想玩高達，但屋企窮無錢，依家大個咗，有返少少經濟能力，又要喺結婚前，想買個靚高達放屋企，咁都唔得？依家搵到喎。細個俾阿媽管，依家俾女朋友管，唔係呀嘛？我明嘅。」

高達迷分享慘況：

譚杏藍稱如果男友跟她說想用兩萬元買高達模型，而他又好鍾意，她也不會反對。譚杏藍更分享自己的親身經歷，「我男友好鍾意電影《回到未來》，都有諗過買原裝模型，記得係要幾千蚊嘅，當時佢心郁郁嘅，我話「買囉，買囉」，心諗又唔係要我買。其實個女仔越係叫你買，你就越係遲疑，到最後佢係自己決定唔買㗎。(支持男友嘅興趣，令彼此關係更加好？)兩個人喺埋一齊，做乜都應該支持啦，又唔係傷天害理。既然唔影響到其他人，佢又好開心嘅，何樂而不為呢？」譚杏藍明白男人心事，更袋錢入姊妹們個袋，大家學到嘢啦。