陳昭昭三年冇見老竇冒險飛柬埔寨：千祈唔好劫色，劫財好喇！

陳昭昭今日（3/9）現身油尖旺多元文化中心出席《中秋火龍亮燈儀式》。近年銳意在國內地產發展的陳昭昭，透露昨日從內地返香港，笑言今次之行是返港𢲷撈：「大家都知我喺內地搞地產，呢三年受疫情影響通唔到關，加上房地產市場經濟唔係咁好，搞到我都要節衣縮食，如果再咁樣搞落去，我真係要復出登台搵錢幫補下，如果唔係我都驚唔夠錢開飯，如果有人搵我指戲我都拍呀！因為今日唔知聽日事㗎，唔通有錢賺都唔賺咩。」

此外，陳昭昭表示一個月後便要飛往柬埔寨探在當地營商的父親：「我冇見爸爸三年，加上中秋節我想返去見佢。而我都知近期嗰邊都傳咗好多唔好嘅消息，都知嗰邊治安唔係咁好。不過我去到當地唔會亂咁坐人哋啲車，我會叫我爸爸嚟接我嘅。（你唔驚中途出事咩？）如果真係有事，千祈唔好劫色，淨係劫財好喇。不過應該唔會有事嘅，始終爸爸係嗰邊做生意都成二十幾年，當地人脈網絡好廣，加上點對點係會安全好多嘅。咁所以我就唔會太過擔心嘅。」