東張西望｜外景主持陳懿德遭「發落」　曾志偉：希望有機會送你走

TVB遊戲節目《開心無敵獎門人》早前進行錄影，《東張西望》今晚（8/7）播出嘉曾志偉、錢嘉樂、阮兆祥及麥美恩當日嘅訪問片段，外景主持人陳懿德一開始就用高八度嘅聲線問曾志偉：「一著上呢套衫，係咪青春感覺返晒嚟？」之後又問：「喺一廠聽到呼歡聲係咪特別感動？」只見曾志偉以可愛聲線回答「一廠、二廠、三廠都好感動，一見到你就開心。」

或者係招架不住曾志偉，於是陳懿德即時轉問其他人，連錢嘉樂都笑指：「做咩突然到我嘅？」其後陳懿德表示：「頭先見到你哋送嘉賓、觀眾走時，眼神都好依依不捨。」曾志偉即時認真mode表示：「同送你走一樣，希望有機會送你走。」陳懿德即時傻笑求情：「唔好，俾個機會我啦。」23歲嘅陳懿德（Rachel）畢業於中大新聞系，熱愛歌劇，考獲8級聲樂專業資格而且身材出眾，於2021港姐決賽中於12強止步，其後加入無綫，並獲安排做《東張》外景主持。