周柏豪搶拍貼地題材　新戲咀連詩雅：佢好鹹！

中國3D數碼娛樂於影視博覽舉行年度記招，一口氣同大家介紹多部新作，其中改編自網絡小說的爆笑喜劇《西謊極落 太爆·太子·太空艙》，就以土地問題入手，講年輕人想搵地方親熱都冇地方，搞到要周圍解決，其中周柏豪就跟連詩雅有場咀戲，不過他的咀後報告竟然係：「佢好鹹！」

今年中國3D數碼娛樂會有多套電影新作推出，包括誠邀到男神黃子華，7年後再與佘詩曼合作的《棟篤特工》、改編自舞台劇，探討中女心態的《29+1》，改編自網絡小說，以年輕人視點笑罵土地問題的《西謊極落 太爆·太子·太空艙》，有《陰陽路》延續篇之稱，邱禮濤執導的《常在你左右》，以及黃真真的《閨蜜2之單挑越南黑幫》，各具特色。

其中柏豪在《西謊極落 太爆·太子·太空艙》內，有機會同連詩雅有咀戲，當人人都羨慕不已時，他的咀後報告竟然係：「我覺得佢好鹹！」站在身旁的Shiga立即反擊：「咁係因為我要喊住同你咀！」同樣有咀而又令人羨慕的是鄧月平，因為她會在《棟篤特工》內有得同子華親熱，就連阿佘聽到都要搶咪追問：「你俾咗幾多錢導演？我都冇喎！」其實套戲仲拍緊，仲有機會要求加戲喎！