金宵大廈2│黑白世界實景搭建 監製:表達黑白顛倒、人性扭曲

《金宵大廈2》昨晚播出的第八集相當破格，李施嬅飾演的Ella進入了七樓半世界，更發現是一個黑白世界，而那個世界用的字體是反轉的，原來這是劇組設計的心思，監製葉鎮輝：「成個黑白世界係搭出嚟嘅，包括Lydia屋企、所有走廊、電梯、商場等，點解唔就咁較色算呢？因為較色感覺冇咁真實，同埋我哋想保留番一啲色彩，例如所有自然嘅物品，好似植物同動物係有顏色嘅，死物就主要黑白灰。」

問到為何會有黑白世界這個概念，以及為何字體在黑白世界中左右反轉，監製葉鎮輝續指:「已經有聰明嘅觀眾估到我哋係想大家清楚分辨到兩個世界，至於點解會選擇黑白色，係因為想表達黑白顛倒、人性扭曲嘅概念，呢個世界所有嘢都係顛倒咗嘅，希洛同阿東就係身處喺一個咁顛倒嘅瘋狂世界，生存喺呢個世界嘅人係幾咁灰，個色彩就係想強調番佢哋內心嘅嗰種灰。」