衛生署性教育指引out到跨世紀　 簡淑兒：畀小朋友睇？

時代雖然進步，但講到性仍然有不少人愛收收埋埋，父母對子女的性教育，亦往往是戰戰兢兢，不知從何入手。青少年對性產生好奇，若然得不到正確引導，隨時自己諗辦法，甚至靠色情刊物或網站解惑。近日有網民分享了衛生署有關於性教育的指引，對於性行為後果，只是簡單列出「意外懷孕」及「性病」，而避免婚前性行為的方法，亦將責任推晒落女方身上。連仙氣女神簡淑兒知悉性教育還停留在上世紀，都忍不住講句「呢啲係咪畀小朋友睇㗎？畀小學生、中學生，大人睇就好似好常識，覺得old school咗啲」。

政府衛生署中央健康教育組，對於如何避免婚前性行為有一套指引，小冊子更圖文並茂講解，首先是女仔「衣著不宜太性感」，睇到這裡估計已經有不少愛美的女生大喝倒采，其實每到夏季Tube Top配熱褲已是很多年青女生的指定衣著，而小冊子竟然將衣著跟性關係掛勾，而且衣著性感並不意味性開放，只是跟個人喜好品味有關。

另一樣引人發笑的地方，呼籲男女不要在幽暗地方約會或二人獨處一室，其實男女約會很多時都會講究氣氛情調，二人世界浪漫一番，當然不可能選擇燈火通明，人來人往的地方。至於小冊子叫大家不要二人共處一室，又是以偏概全的例子，一男一女共處一室，並不一定帶有性暗示，一樣可以有其他活動。簡淑兒接受《香港01》記者訪問，她以WhatsApp回應：「以前個年代，以前細個我學校會學囉，十幾廿年前嗰啲，依家小朋友好早熟，呢啲佢哋會攞嚟笑囉，但都係正面message，方法係old school咗，依家啲年青人未必buy。」

其實青少年避免婚前性行為，男女雙方均有責任，但在衛生署性教育的小冊子中，再次將責任推給女生，例如一定是女仔說「不」，要女仔措詞強硬，女方冷靜考慮性行為的後果。在今天男女平等的年代，這些性教育顯得離地又過時。簡淑兒續道：「Message意識係好嘅，俾啲乜嘢係性教育都唔知嘅人睇，好似小學上性教育堂，（覺唔覺得離地？）都適合返衛生署嘅形象，保守啲同好old school。」簡淑兒笑言正在讀大學的胞弟，因為不懂看中文，這些性教育指引是無用武之地，她笑說：「男仔唔緊要啦，男仔唔怕蝕底呀嘛。」看來衛生署還有不少改進空間，培育下一代不止睇學業成績，性教育亦是很重要的一環。