雪姨拍片講網上求職騙案　留言最精彩：你存在已經係騙案

自從「盆菜風波」後，雪姨上月「復出」YouTube界，任憑網民圍剿、食店出聲明割蓆，但雪姨就好似開咗濾鏡一樣，完全睇唔到，繼續努力拍片。

雪姨日前又有新片，今次係講網上求職騙案，仲搵嚟受害人分享經過。成件事大致係受害人Shirley(化名）喺網上應徵投資公司文書助理 ，時薪120元，點知到最後原來係借出自己銀行戶口去借貸，Shirley話騙徒每次都係透過WhatsApp Call同佢聯絡，而最終佢分別喺兩間銀行、四間財務公司貸款2百萬，當中有40萬已經轉帳……

呢類騙案《東張西望》都報道過N咁多次，咁由雪姨出片又有咩特別呢？特別在佢同受害人都真係用把口去講，完全冇提供過任何對話截圖、借貸文件、轉帳記錄等等，唔少網民都質疑其可信性，亦有指受害者語調輕鬆，完全唔似被人呃錢。

而且網民留言亦完全唔俾面，甚至直斥「你存在已經係騙案」，亦有留言問「盤菜既短片變左係生髮水既廣告，請問算是網上騙案嗎？」影片上載三日已經7百多個留言，但觀看人次只得3萬多，同雪姨過往嘅影片相比，可算係插水式。