前《東張》主持林希靈自揭離巢真相：趁未太老想同男友陳安立合作

前《東張西望》女主持林希靈因「聾啞女」美華事件直斥女保安「你咁樣好冇人性喎」而一夜爆紅，更被譽「大台清泉正義女神」。不過之後，林希靈突然在IG宣佈要離開TVB，令網民感到錯愕。今日（7/2）林希靈現身粉嶺出席北區派福袋送暖慈善活動時接受《香港01》訪問說：「其實我喺公司都7年時間，基本上我一返嚟香港就入咗呢間公司，咁我都做咗7年時間，就覺得好似讀咗中學課程咁，加上我又滿約，就諗不如出去試吓闖一闖，因為再過多五年十年之後，我就冇咁嘅勇氣出去闖，所以就把心一橫就嚟就嚟啦！」

被問到離開其中一個原因是否想拍劇？林希靈續說：「其實另一樣嘢令我要走嘅原因係我想同陳安立合作，因為我同佢拍咗拖都一段時間，而且冇乜機會同場合作，咁所以我覺得趁唔係太老，就想試吓出嚟睇吓有冇機會合作做節目。因為啲人成日講情侶一齊做嘢，實有機會嘈交。而我就從來都未試過，咁所以我都好想試吓會唔會，因為我哋就算去旅行都未嘈過交，咁所以我都好想觸碰佢嘅低線係點，哈哈！因為我哋有時嘈交佢都會先講對唔住，佢係冇原則，哈哈！」