【請勿關燈】仲想讚TVB拍得夠驚嚇　原來係2億點播的國產出品

自TVB新節目《請勿關燈》播出預告後，網民都大呼期待，因為近年TVB好似跟內地電檢接軌般，甚少拍靈異驚嚇題材的劇集和節目，對上一個已是2014年的《區區有鬼故》，故觀眾層上已儲了好一班「餓鬼群」。節目在昨晚播出，無論氣氛、懸疑度、驚嚇情節都做出水準，正當大家想大讚出品有誠意之際，卻發現劇中演員對白全數配音，而且場景背後又有大量簡體字。啊！原來是國產貨，屬於騰訊視頻去年4月出品，全國首個驚慄網劇《慎點》，由眾年輕導演執導。連香港至耍家的靈異題材都要搵外援，聽落都覺唏噓。

內地點播過兩億

大家可能會問，明明合拍片一遇鬼怪題材就被封殺，內地何來有套靈異劇出現呢？其實內地部門為鼓勵創作，制度上對網劇的監控又會寬鬆些，而這套《慎點》就是內地首部靈異驚慄網劇。每集均由兩個短故事合併而成，劇集推出半年間，已開到第三季，頭兩季網上點率達1.1億，單是第三季又突破9,000萬，成績相當猛！昨晚大家看到的〈辦公室打印機〉、〈凌晨監控室〉等故事，就是來自該系列。但凡外購節目，TVB都有一套包裝手法，但今次冇再搵兩班人睇片玩遊戲請俾趣咁歡欣，節目找來去年憑《一屋老友記》獲飛躍進步男藝員的張頴康主持，並再搵藝員同事每人分享一個親身經歷或從身邊友人聽回來的鬼故事。第一集就有黃心穎、陸浩明、黎諾懿供料，其中黎諾懿講的馬來西亞酒店鬼故，是他的親身經歷，聽落都幾心寒。

靚媽角色搞到觀眾錯重點

有人聽見是「內地劇」三個字就好似見鬼一樣，鬼殺咁嘈，其實客觀講，這套《慎點》的拍攝頗有水準，畫面富電影感之餘，情節懸疑得來夠氣氛，結局出人意表，至於驚嚇程度，以電視尺度計算踩到好盡，由劇本到拍攝技巧都取勝，心服口服的，難怪引起網民談論。更吸睛是第一集有位頗索的女演員飾演阿媽，她無論起身坐低，導演的拍攝角度都從男性視點出發，搞到大家分晒神。第一集出街後，已經引起咁大迴響，以後逢星期日晚11點可以有返電視睇喇！