隱門｜陳少邦拗柴死頂繼續拍打戲　封箱膠紙當繃帶撐到收工

入行逾21年嘅陳少邦，一直在演藝圈中默默耕耘，就好似呢日佢為TVB劇集《隱門》拍攝外景時，開工無耐就「拗柴」，但為怕影響拍攝進度，所以將封箱膠紙當繃帶咁用，一直拍到黃昏時份收工先去睇醫生。

劇中既係臥底但又會殺人嘅陳少邦，呢日一早就同吳岱融拍攝叢林追逐戲，之不過，著住皮鞋嘅佢不幸地拗柴，腳踝腫如「豬蹄」之餘，仲連對新鞋鞋底都一分為二。不過少邦一於少理，以封箱膠紙紮腳減輕痛楚後，即時繼續開工，拍攝打鬥、追逐場面，十分專業。他接受《香港01》訪問時表示早上拍攝時可能仲未完全瞓醒，加上山路多碎石，所以一不留神就出事了。「其實我今次都多動作戲，但而家未知會唔會腳傷而減少。今日講我想殺岱融哥，之後我仲會搵車撞佢，其實今次都幾好現，你睇我頭先同岱融哥對打，成個人百幾二百磅撞埋去都幾唔講得少。」 陳少邦表示之前有跟冼灝英學大聖劈掛，所以算是也有功夫底子。