【射鵰】網民提議吳業坤簡淑兒演郭靖黃蓉　簡淑兒：我冇咁仙氣！

最近內地翻拍《射鵰英雄傳》，估唔到好多金庸網友留意，仲大讚由李一桐扮演的黃蓉可愛剎食。不過昨日有網友就建議無綫又翻拍《射鵰英雄傳 2017》，更詳細列出每個角色建議，似乎網友真係好有興趣睇《射鵰英雄傳》。

估不到網友提議最近火紅的吳業坤或者離巢的羅仲謙飾演郭靖，今年提名金像獎「最佳新人獎」的坤哥擔正，對坤哥果然好有信心，仲有人笑言叫坤哥戴眼鏡拍古裝劇。至於人見人愛的黃榕呢？網友則提議何雁詩或簡淑兒（Jessica）演出，Jessica憑「腰果眼」贏得網民的心，仍然未有機會擔正的Jessica，飾演黃蓉與坤哥做一對，大家又buy唔buy呢？

香港01記者就電話訪問坤哥，問到他今次被推舉做郭靖，他即表示︰「咁搞笑？以前細個都有睇過《射鵰英雄傳》，不過就唔係好清楚入面啲情節，我以前都客串過古裝劇。（網民叫簡淑兒做黃蓉喎）咁益我！」坤哥笑指沒想過有機會做郭靖，最想拍出好型仔的武俠出場戲份。而簡淑兒則說：「我細細個已經睇金庸，真係估唔到網友咁講，不過我都有自知自明，我就冇黃榕咁有仙氣，坤哥做郭靖都幾搞笑喎！」點會呀?你出名仙氣女神喎 !

至於其他角色，網民提議傅嘉莉或王君馨飾演穆念慈，楊康就由何廣沛或楊明飾演，如果王君韾擅長跳舞，相信學穆念慈打功夫都相當有睇頭。同時亦建議吳岱融和單立文演出大反派東邪和西毒，似乎「鷲哥」奸角形象真係好深入民心，御用「西門慶」豹哥近排在《乘勝追撃》演出都獲好評。另外南帝和北丐，則建議黃子雄和黎耀祥，不過有人就話祥仔曾四度飾演「老頑童」，絕對是最資深「老頑童」，提議不如畀機會林盛斌（Bob）！

不過現時《射鵰英雄傳》製作成本高，香港成本好難與內地比較，又笑指︰「又黎（嚟）城門水塘同南生圍？！」網友又笑鉅記經常贊助無綫劇︰「黃翠如同孖埋簫正楠做，一家團聚做對成熟版「射鵰」，炬（鉅）記又贊助，澳門取景。」